চোৰাং কাঠৰ অবৈধ সৰবৰাহকাৰীৰ বিৰুদ্ধে কোকৰাঝাৰত অব্যাহত আছে বন বিভাগৰ অভিযান। বেচৰকাৰী সংস্থা এণ্টি কৰাপশ্যন ইনভেষ্টিগেশ্যন ফ্ৰণ্ট অৰ্গেনাইজেশ্য, বন বিভাগ, এছ এছ বি আৰু অসম আৰক্ষীয়ে শনিবাৰে কোকৰাঝাৰ আৰু চিৰাঙৰ বিভিন্ন অঞ্চলত যৌথ অভিযান চলায়।
অভিযানকালত দলটোৱে কোকৰাঝাৰ কুসুগাঁও আৰু ৰেপু চিৰাং বনাঞ্চলৰ পৰা বৃহৎ পৰিমাণৰ চোৰাং শাল কাঠৰ কুন্দাসহ চোৰাং কাঠ সৰবৰাহকাৰীৰ বাহন জব্দ কৰিবলৈ সক্ষম হয়।
কোকৰাঝাৰ বন বিভাগে জনোৱা মতে কোকৰাঝাৰ আৰু চিৰাং জিলাৰ উল্টাপানী আৰু কুসুগাঁও বনাঞ্চলৰ বিভিন্ন ঠাই ক্ৰমে জাহাৰবাৰী, মৈণাগুৰি, দুমবাজাৰ, চৰাইবিল, চেলেকাগুৰি, নিজলাগুৰি, ৰুণীখাটাকে ধৰি আদি অঞ্চলত বনধ্বংস কাৰ্যকলাপ চলি থকা বুলি জানিব পাৰি তেওঁলোকে অভিযান চলাইছিল।
এই অভিযানত বৃহৎ পৰিমাণৰ মূল্যবান গছৰ কুন্দাসহ চোৰাং কাঠ সৰবৰাহকাৰীৰ এখন টাটা মোবাইল, ট্ৰাক, ট্ৰেক্টৰ আদিকে ধৰি কেইবাখনো বাহন জব্দ কৰিবলৈ সক্ষম হয়।
উল্লেখযোগ্য যে কুসুগাঁও, উল্টাপানী আৰু ৰেপু চিৰাং বনাঞ্চলত চোৰাং কাঠ সৰবৰাহকাৰীৰ অবাধ বন ধ্বংস কাৰ্যকলাপ বৃদ্ধি পাই আহিছে।
