লোকসভাত সুকলমে তিনিখনকৈ কৃষি বিধেয়ক গৃহীত হোৱাৰ পিচত আজি ৰাজ্যসভাৰ মজিয়াত উত্থাপন হ’ব কৃষি বিধেয়ক ।
বিৰোধীৰ প্ৰৱল প্ৰতিবাদৰ মাজতো ৰাজ্যসভাত কৃষি বিধেয়ক উত্থাপন কৰিব যদিও বিধেয়ক কেইখন ৰাজ্যসভাত গৃহীত কৰোৱাটো এনডিএৰ বাবে সিমান সহজ নহ’ব ।
কাৰণ বৰ্তমানৰ ২৪৩ গৰাকী সাংসদ থকা (দুখন আসন এতিয়াও খালী হৈ আছে) ৰাজ্যসভাত বিজেপিৰ সাংসদৰ সংখ্যা হৈছে ৮৬ গৰাকী,কংগ্ৰেছৰ সাংসদৰ সংখ্যা ৪০,তৃণমূলৰ ১৩, সমাজবাদী পাৰ্টীৰ ৮, টিআৰএছৰ ৭,বিজেডিৰ ৯, এআইএডিএমকেৰ ৯, জনতা দল ইউনাইটেডৰ ৫,ডিএমকেৰ ৭,আৰজেডিৰ ৫ গৰাকী সাংসদ আছে।
বিৰোধীয়ে যদি ভেটা দিয়ে তেন্তে এনডিএই সহজে কৃষি বিধেয়ক কেইখন গৃহীত কৰোৱাটো সহজ নহ’ব।
ইতিমধ্যে বিজেপিয়ে দলৰ সাংসদসকলৰ বাবে থ্ৰী লাইন হুইপ জাৰি কৰিছে।
ইপিনে বিধেয়ক কেইখন গৃহীত হোৱাৰ ক্ষেত্ৰত বাধা দিবলৈ প্ৰাণপণে চেষ্টা অব্যাহত ৰাখিছে বিৰোধী দল সমূহে।
ডিএমকেৰ সাংসদ টি কে এছ ইলানগোভানে কৃষি বিধেয়ক কেইখন সন্দৰ্ভত প্ৰতিক্ৰিয়া ব্যক্ত কৰি কয় যে এই বিধেয়ক কেইখনে কৃষকৰ সকলো অধিকাৰ হৰণ কৰি কৃষকসকলক দাসত পৰিণত কৰিব।
ইতিমধ্যে শিৰোমণি আকালি দলৰ সাংসদ তথা কেন্দ্ৰীয় মন্ত্ৰী হৰচিমৰত কৌৰ বাদলে এই বিধেয়ক কেইখনৰ প্ৰতিবাদত পদত্যাগ কৰিছে।
