অৰ্থনৈতিক সংকটক কেন্দ্ৰ কৰি সৃষ্টি হোৱা ৰাজনৈতিক অস্থিৰতাৰ মাজতে দ্বীপৰাষ্ট্ৰ শ্ৰীলংকাত নতুন চৰকাৰ গঠনৰ বাবে সাজু হৈছে বিৰোধী দলৰ নেতা সাজিত প্ৰেমদাসা।
বিৰোধী নেতাগৰাকীয়ে ৰাষ্ট্ৰপতি গোটাবায়া ৰাজপাক্ষেলৈ এখন মুকলি পত্ৰ লিখি প্ৰধানমন্ত্ৰীৰ কাৰ্যভাৰ গ্ৰহণ কৰিবলৈ সাজু বুলি জানিবলৈ দিছে।
প্ৰেমদাছাই পত্ৰখনত কয় যে ‘চামাগি জানা বালাৱেগয়া’ নেতৃত্বাধীন বিৰোধীয়ে এখন নতুন অন্তৱৰ্তীকালীন চৰকাৰ গঠন কৰিবলৈ ইচ্ছুক। অৱশ্যে ইয়াৰ বাবে চাৰিটা চৰ্ত আৰোপ কৰিছে প্ৰেমদাসাই।
চৰকাৰ গঠনৰ ক্ষেত্ৰত প্ৰেমদাছাই আৰোপ কৰা চাৰিটা চৰ্ত অনুসৰি ৰাষ্ট্ৰপতি গোটাবায়া ৰাজপাক্ষেই এক নিৰ্দিষ্ট সময়ৰ ভিতৰত পদত্যাগ কৰিব লাগিব।
দ্বীতিয়তে, ৰাষ্ট্ৰপতিৰ কাৰ্যবাহী ক্ষমতা বাতিল কৰিব লাগিব।
তৃতীয়তে, সংবিধানৰ ১৯ তম সংশোধনী দুসপ্তাহৰ ভিতৰত কাৰ্যকৰী কৰিব লাগে।
চতুৰ্থতে, কাৰ্যকৰীকৰণ সাংবিধানিক সংস্কাৰৰ পিছত সংসদীয় নিৰ্বাচনে নতুন চৰকাৰ নিয়োগ কৰিব।
ৰাষ্ট্যপতি ৰাজাপাক্ষেক সংসদীয় নিৰ্বাচনৰ আহ্বান জনাই জনসাধাৰণক এখন নতুন স্থিৰ চৰকাৰ নিৰ্বাচন কৰাৰ সুযোগ দিয়াৰ লগতে আইনৰ শাসন প্ৰতিষ্ঠা কৰিবলৈ দাবী জনায় বিৰোধী নেতাগৰাকীয়ে।
উল্লেখ্য যে পুৱতি নিশা ৰাষ্ট্ৰপতি গোটাবায়া ৰাজপাক্ষেই এক ভাষণযোগে সাংবিধানিক সংস্কাৰ প্ৰৱৰ্তনৰ উদ্দেশ্যে এই সপ্তাহতে এজন নতুন প্ৰধানমন্ত্ৰী আৰু যুৱ কেবিনেট নিযুক্ত কৰিব বুলি ঘোষণা কৰিছিল।