বিৰোধী দলৰ সাংসদসকলে উপ ৰাষ্ট্ৰপতি তথা ৰাজ্যসভাৰ অধ্যক্ষ জগদীপ ধনখৰৰ বিৰুদ্ধে অনাস্থা প্ৰস্তাৱ আনিছে। মঙলবাৰে বিৰোধীয়ে অনা এই অনাস্থা প্ৰস্তাৱ ভাৰতৰ সংসদীয় ইতিহাসৰ প্ৰথমটো ঘটনা।
সূত্ৰ অনুসৰি, ৰাজ্যসভাৰ ৭০জন বিৰোধী সাংসদে এই অনাস্থা প্ৰস্তাৱত স্বাক্ষৰ কৰিছে। বিগত বৰ্ষাকালীন অধিৱেশনত ৰাজ্যসভাৰ অধ্যক্ষক অপসাৰণৰ বাবে বিৰোধী শিবিৰে অনাস্থা প্রস্তাৱ উত্থাপন কৰাৰ কথা আছিল৷ কিন্তু সেইবাৰ অনা নহ’ল। খবৰ অনুসৰি এইবাৰ শীতকালীন অধিবেশনত সেইটো উত্থাপন কৰা হ’ব।
ভাৰতীয় সংবিধানৰ ৬৭(খ) অনুচ্ছেদৰ অধীনত অনাস্থা প্ৰস্তাৱ দাখিল কৰা হৈছে। কংগ্ৰেছৰ সূত্ৰ অনুসৰি ৰাজ্যসভাৰ বিৰোধী সাংসদৰ ভিতৰত ছোনিয়া গান্ধীও আছে। তেওঁৱো এই প্ৰস্তাৱত স্বাক্ষৰ কৰে।
জগদীপ ধনখৰৰ অপসাৰণ কিয় বিচাৰিছে বিৰোধীয়ে?
সংসদৰ উচ্চ সদনৰ শাসক শিবিৰৰ প্ৰতি জগদীপ ধনখৰৰ পক্ষপাতিত্ব কৰা বুলি অভিযোগ উত্থাপন কৰিছে ইণ্ডিয়া মিত্ৰজোঁটে। বিৰোধী দলৰ সাংসদসকলৰ ভাষণৰ সময়ত যি ধৰণে বাধা দিয়া হয় সেয়া কাৰ্যতঃ অভূতপূৰ্ব। বিৰোধী শিবিৰৰ সাংসদসকলে অভিযোগ কৰে যে ৰাজ্যসভাত সৰ্বোচ্চ পদত অধিষ্ঠিত হৈ থকাৰ সময়তো বিজেপিৰ প্ৰতি তেওঁৰ আনুগত্য স্পষ্ট হৈ পৰিছে।
জানিব পৰা মতে, প্ৰকাশ্যে পক্ষপাতিত্ব, অযথা কণ্ঠৰোধৰ অভিযোগৰ বাবে ৰাজ্যসভাৰ অধ্যক্ষৰ বিৰুদ্ধে অনাস্থা প্ৰস্তাৱ দাখিল কৰা হৈছে।
