বোকাখাতত অনুষ্ঠিত হ’ব লগা ২৮ সংখ্যক অসম মাষ্টাৰ্ছ এথেলেটিকছ প্ৰতিযোগিতাত শাসনাধীষ্ঠ দলৰ কোনো নেতা, পালিনেতাক অনুষ্ঠানলৈ নিমন্ত্ৰণ নজনোৱাৰ সিদ্ধান্ত লৈছে আয়োজক সমিতিয়ে।
আজি বোকাখাতৰ পুৱতি সাহিত্য সভা ভৱনত অনুষ্ঠিত এক ৰাজহুৱা সভাত সাধাৰণ লোকৰ মতৰ ভিত্তিত আয়োজক সমিতিয়ে এই সিদ্ধান্ত গ্ৰহণ কৰে।
অসম মাষ্টাৰ্ছ এথেলেটিকছ প্ৰতিযোগিতাৰ বোকাখাতৰ আয়োজক সমিতিৰ কাৰ্যকৰী সভাপতি কেশৱ উপাধ্যায়ৰ অধ্যক্ষতাত আয়োজিত সভাত কা বিৰোধী আন্দোলনত চহিদ হোৱা লোকসকলৰ প্ৰতি শ্ৰদ্ধাঞ্জলি জনোৱা হয়।
আয়োজক সমিতিৰ সম্পাদক সুবোধ বৰাই আঁত ধৰা সভাত অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱাই সময় মতেই প্ৰতিযোগিতাখন অনুষ্ঠিত কৰাৰ কথা ব্যক্ত কৰে।
আনহাতে বোকাখাত আঞ্চলিক ছাত্র সন্থাৰ সভাপতি দীপ ঠাকুৰীয়া, আটছাৰ বোকাখাত শাখাৰ সভাপতি সুশীল কালিন্দী, অসম গোৰ্খা ছাত্ৰ সন্থাৰ বোকাখাতৰ সভাপতি ৰূদ্ৰ চেত্ৰীয়ে প্ৰতিযোগিতাখনৰ প্ৰতি পূৰ্ণ সহায় সহযোগিতা আগবঢ়োৱাৰ কথা ব্যক্ত কৰি প্ৰতিযোগিতাথলিত মন্ত্ৰী অতুল বৰাৰ উপস্থিতিৰ তীব্ৰ বিৰোধিতা কৰে।
ছাত্ৰ সংগঠন কেইটাৰ মতে অতুল বৰাই এতিয়াও নাগৰিকত্ব সংশোধনী আইন সম্পৰ্কত অসমৰ জনসাধাৰণৰ আগত স্থিতি স্পষ্ট কৰা নাই। আদৰণি সমিতিৰ সভাপতি হিচাবে মন্ত্ৰী অতুল বৰা আৰু শাসনাধীষ্ঠ দলৰ আন নেতাৰ উপস্থিতিত ছাত্ৰ সংগঠনে প্ৰতিবাদী কাৰ্যসূচী ল’বলৈ বাধ্য হ’ব বুলি জনায়।
এনে পটভূমিত পূৰ্ব নিৰ্ধাৰিত সময় আৰু স্থানতে ২৮ সংখ্যক অসম মাষ্টাৰ্ছ এথেলেটিকছ প্ৰতিযোগিতা অনুষ্ঠিত কৰি ৰাজনৈতিক নেতাৰ উপস্থিতি বা নিমন্ত্ৰণ নকৰাৰ বাবে সভাই সিদ্ধান্ত গ্ৰহন কৰে।
আয়োজক সমিতিৰ সভাপতি হ’লেও আজিৰ সভাই প্ৰতিযোগিতা থলিত তেওঁৰ উপস্থিতি কামনা কৰা নাই বুলি মন্ত্ৰী অতুল বৰাক জনোৱাৰ বাবেও সিদ্ধান্ত লোৱা হয়।
সভাত অসম মাষ্টাৰ্ছ এথেলেটিকছৰ কাৰিকৰী সঞ্চালক মোহন চন্দ্ৰ বৰা, ৰাজ্যিক কাৰ্যকৰী সদস্য চক্ৰধৰ দত্ত, মিনু শইকীয়া, গোলাপ শইকীয়া উপস্থিত থাকি মত বিনিময় কৰে।
