চিকিৎসকসকলৰ লিখাক লৈ সাধাৰণতে প্ৰায়েই প্ৰশ্ন উত্থাপিত হয়। ইয়াৰ মাজতে উৰিষ্যা উচ্চ ন্যায়ালয়ে নিৰ্দেশ দিছে যে চিকিৎসকসকলে ডাঙৰ হাতৰ আখৰ অৰ্থাৎ কেপিটেল লেটাৰত দৰৱ তথা নিদান পত্ৰ (প্ৰেছস্ক্ৰীপশ্যন) লিখক।
এক শুনানিৰ সময়ত ন্যায়াধীশ এছ কে পাণিগ্ৰাহীয়ে কয় যে চৰকাৰী বা ব্যক্তিগত তথা আন মেডিকেল প্ৰতিষ্ঠানত কাম কৰা চিকিৎসকসকলে দৰৱৰ নাম ডাঙৰ হাতৰ আখৰত লিখা উচিত যাতে সেয়া পঢ়িব পৰা যায়।
উৰিষ্যা উচ্চ ন্যায়ালয়ে এখন জামিন আবেদনৰ শুনানিৰ সময়ত এই নিৰ্দেশ দিয়ে।
জামিন আবেদনত এগৰাকী আবেদনকাৰীয়ে নিজৰ বেমাৰী পত্নীৰ চোৱাচিতাৰ বাবে দাখিল কৰিছিল।
নিজৰ আবেদনৰ সৈতে আবেদনকাৰীয়ে নিজৰ পত্নীৰ মেডিকেল তথ্য পাতিও গাঁঠি দিছিল। আদালতে সেই মেডিকেল তথ্যপাতিসমূহ পঢ়ি চোৱাত বহু কঠিনতা থকাৰ লগতে সেয়া সাধাৰণ লোকে বুজি পোৱাৰ বাহিৰত বুলি পতিয়ন যায়।
আদালতে কয় যে চিকিৎসকৰ পঢ়িব নোৱাৰা লিখাই ইসকলৰ এনে মেডিকেল ৰিপৰ্টৰ সৈতে জড়িত হ’বলগীয়া হয় তেনে ৰোগী, ফাৰ্মাচিষ্ট, আৰক্ষী, পৰীক্ষাকাৰী, ন্যায়াধীশৰ বাবে অনাহক জটিলতাৰ সৃষ্টি কৰে।
চিকিৎসকসকলে নিদান পত্ৰ, অ’পিডি শ্লিপ, মৰণোত্তৰ পৰীক্ষাৰ প্ৰতিবেদন আদি বুজিব পৰাকৈ আৰু সুস্পষ্টকৈ লিখা উচিত।
ন্যায়াধীশ পাণিগ্ৰাহীয়ে কয় যে ডিজিটেল যুগত নিদান পত্ৰ সুস্পষ্টকৈ লিখাৰ কেইবাধৰণৰো বিকল্প আছে। ইয়াৰ ফলত চিকিৎসা ৰোগীৰ বাবে আৰু অধিক সুফলদায়ক হ’ব।
ন্যায়াধীশগৰাকীয়ে লগতে এই বিষয়ত চিকিৎসা সেৱাৰ লোকসকলৰ মাজত সজাগতা বৃদ্ধিৰো নিৰ্দেশ দিয়ে।
