মণিপুৰৰ থৌবাল জিলাৰ মইজিং গাঁৱত চুবুৰীয়াই ধৰ্ষণ কৰাৰ অভিযোগত এগৰাকী ১৪ বছৰীয়া কিশোৰী গৰ্ভৱতী হোৱাৰ খবৰ পোহৰলৈ আহিছে।
এই ঘটনাৰ প্ৰতিক্ৰিয়া স্বৰূপে থৌবাল জিলা আদালতৰ বাহিৰত আৰু মইজিং গাঁৱত প্ৰতিবাদৰ সৃষ্টি হৈছে।
মণিপুৰ আৰক্ষীয়ে জনোৱা মতে, প্ৰসাধন সামগ্ৰীৰ বিক্ৰেতা এম ডি চুলেইমান (৩৫) নামৰ অভিযুক্ত ব্যক্তিজনক যোৱা ১৬ অক্টোবৰত মইজিং গাঁৱৰ নিজা বাসগৃহৰ পৰা জিম্মাত লোৱা হৈছিল।
ইয়াৰ পিছত সোমবাৰে তেওঁক যৌন অপৰাধৰ পৰা শিশু সুৰক্ষা আইন (পিঅ’চিএছঅ’) আইনৰ অধীনত গোচৰ চোৱাচিতা কৰা বিশেষ আদালতত হাজিৰ কৰা হয় আৰু এতিয়া তেওঁ ন্যায়িক জিম্মাত আছে।
ভুক্তভোগীৰ আত্মীয় বাবুল আহমেদে জনোৱা মতে, অভিযুক্তই কিশোৰীগৰাকীক প্ৰসাধন সামগ্ৰীৰে প্ৰলোভিত কৰি ধৰ্ষণ কৰিছে।
উল্লেখ্য যে, ধৰ্ষণৰ তিনিমাহৰ পিছতহে এই জঘন্য কাণ্ড পোহৰলৈ আহে যেতিয়া ছোৱালীজনীয়ে গৰ্ভধাৰণৰ লক্ষণ প্ৰদৰ্শন কৰিবলৈ ধৰিলে। পৰিয়ালৰ লোকে সম্পূৰ্ণ সোধা-পোছা কৰাৰ পিছত ছোৱালীজনীয়ে ধৰ্ষণৰ কথা প্ৰকাশ কৰে।
এই ঘটনাই অঞ্চলটোত তীব্ৰ ক্ষোভ আৰু মতানৈক্যৰ জোৱাৰৰ সৃষ্টি কৰিছে। থৌবাল জিলা আদালতৰ বাহিৰত বিক্ষোভকাৰীয়ে সমবেত হৈ ভুক্তভোগীৰ ন্যায়ৰ দাবী জনাইছে।
