বৰদিনকলৈ সমগ্ৰ বিশ্বৰ লগতে ইথিঅ’পিয়াতো আনন্দৰ দোৱাৰ উঠি থকাৰ সময়তে দেশ খনৰ পশ্চিম প্ৰান্তত অৱস্থিত বেনিছনগুল-গুমুজ নামৰ গাঁও খনত তাইগ্ৰে বিদ্ৰোহীয়ে টলোৱা ভয়ংকৰ আক্ৰমণত এতিয়ালৈকে ১২০ জন লোকৰ মৃত্যু ঘটাৰ কথা নিশ্চিত কৰা হয়।
আৰক্ষী সূত্ৰই প্ৰকাশ কৰা মতে তাইগ্ৰে বিদ্ৰোহীয়ে ইথিঅ’পিয়াৰ প্ৰাচীন জনগোষ্ঠী আমহাৰা সম্প্ৰদায়ৰ লোকসকলৰ ওপৰত প্ৰায়ে আক্ৰমণৰ ঘটনা সংঘটিত কৰি আহিছে।
যোৱা নিশা সংঘটিত ঘটনাত বহু লোক আহত হৈছে। আহত সকলৰ বহুতৰে অৱস্থা সংকটজনক হোৱালৈ চাই নিহতৰ সংখ্যা আৰু বৃদ্ধি পোৱাৰ আশংকা কৰা হৈছে।
স্থানীয় একাংশ লোকে প্ৰকাশ কৰা মতে তাইগ্ৰে বিদ্ৰোহীৰ প্ৰায় ৫০ জনীয়া দল এটাই গাঁও খনত প্ৰৱেশ কৰি ঘৰৰ পৰা সকলোকে বাহিৰলৈ ওলাই অহাৰ নিৰ্দেশ দিয়ে।
ঘৰৰ বাহিৰলৈ ওলোৱাৰ পিছতে লোকসকলৰ ওপৰত বিদ্ৰোহীৰ দলটোৱে গুলীবৰ্ষণ আৰম্ভ কৰে।
ইথিঅ’পিয়াৰ প্ৰধানমন্ত্ৰী আবি আহমেদয়ে আজি বিয়লি ঘটনাস্থলী পৰিদৰ্শন কৰি নিহতসকলৰ পৰিয়ালক সাহায্যৰ আশ্বাস দিয়ে।
উল্লেখ্য বিগত কিছুদিন ধৰি ইথিঅ’পিয়াত গোষ্ঠী সংঘৰ্ষৰ দাৱানল জ্বলি উঠিছে। এই সংঘৰ্ষত এতিয়ালৈকে সহস্ৰাধিক লোক নিহত হৈছে।