বিগত ১৫ বছৰত কিমানজন অবৈধ ভাৰতীয়ক আমেৰিকাৰ পৰা বিতাড়িত কৰা হৈছে সেই সন্দৰ্ভত বৃহস্পতিবাৰে সংসদত বৈদেশিক পৰিক্ৰমা মন্ত্ৰী এছ জয়শংকৰে তথ্য প্ৰদান কৰে। বিদেশ মন্ত্ৰালয়ে শুকুৰবাৰে সংসদত বৰ্তমান কিমানজন ভাৰতীয় বিদেশী কাৰাগাৰত বন্দী হৈ আছে তথ্য দাখিল কৰি জনায়।
বিদেশৰ কাৰাগাৰসমূহত ক’ত কিমানজন ভাৰতীয় বন্দী হৈ আছে সেই সন্দৰ্ভত তথ্য দিবলৈ সংসদত বৈদেশিক পৰিক্ৰমা মন্ত্ৰালয়ক বিচৰা হৈছিল। বৈদেশিক পৰিক্ৰমা ৰাজ্য মন্ত্ৰী কীৰ্তি বৰ্ধন সিঙে এই তথ্য লোকসভাত লিখিত ৰূপত প্ৰদান কৰে। তেওঁ জনায় যে বিদেশৰ কাৰাগাৰসমূহত মুঠ ১০,১৫২ জন ভাৰতীয় কয়দী আছে। ইয়াৰ ভিতৰত বিচাৰাধীন বন্দীও আছে।
বৈদেশিক পৰিক্ৰমা মন্ত্ৰালয়ে প্ৰদান কৰা তথ্য অনুসৰি ৮৬খন দেশত বিচাৰ চলি থকা আৰু শাস্তিপ্ৰাপ্ত ভাৰতীয়ৰ সংখ্যা ১০ হাজাৰৰো অধিক। এই ভাৰতীয় কাৰাবন্দী হৈ থকা দেশসমূহ হ’ল চৌদি আৰব, কুৱেইট, সংযুক্ত আৰব আমিৰশ্বাহী, কাটাৰ, নেপাল, পাকিস্তান, আমেৰিকা, শ্ৰীলংকা, স্পেইন, ৰাছিয়া, ইজৰাইল, চীন, বাংলাদেশ আৰু আৰ্জেণ্টিনা।
চৌদি আৰৱৰ কাৰাগাৰত বন্দী হৈ আছে ২৬৩৩জন ভাৰতীয়। সংযুক্ত আৰব আমিৰশ্বাহীত ২৫১৮জন লোক কাৰাবন্দী হৈ আছে। নেপালত কাৰাগাৰত বন্দী হৈ আছে ১৩১৭জন লোক। শ্ৰীলংকা আৰু পাকিস্তানত ক্ৰমে ২৬৬ আৰু ৯৮ জন।
কাটাৰৰ কাৰাগাৰত কিমান ভাৰতীয় বন্দী হৈ আছে তাক লৈও প্ৰশ্ন উত্থাপন হয়। সেই সময়ত মন্ত্ৰালয়ে জনায় যে তাত ৬১১ জন ভাৰতীয় বন্দী আছে। ইয়াৰ উপৰিও উল্লেখ কৰা হয় যে বৈদেশিক পৰিক্ৰমা ৰাজ্যিক মন্ত্ৰীয়ে দাবী কৰা মতে কাটাৰ চৰকাৰৰ আইন অতি কঠোৰ আৰু তেওঁলোকে কয়দীসকলৰ কোনো তথ্য ভাগ-বতৰা কৰিব নিবিচাৰে, সেয়েহে ক’ত আৰু কিমানজন কয়দী আছে সেই সম্পৰ্কে সম্যক তথ্য লাভ কৰা হোৱা নাই। অৱশ্যে বিদেশৰ কাৰাগাৰত থকা ভাৰতীয় বন্দীসকলৰ সুৰক্ষা সম্পৰ্কীয় বিষয় সন্দৰ্ভত সংশ্লিষ্ট দেশসমূহৰ সৈতে চৰকাৰে যোগাযোগ ৰাখিছে।
