বিগত ছয় বছৰত ৰাজ্যৰ যুৱক-যুৱতীসকলৰ মজত উদ্বেগজনকভাৱে বৃদ্ধি পাইছে নিষিদ্ধ ঘোষিত সংগঠনৰ প্ৰতি আকৰ্ষণ। এই ছয় বছৰত অৰ্থাৎ ২০১৬ চনৰ পৰা অসমৰ ১৫০০ ৰো অধিক যুৱক-যুৱতীয়ে বিভিন্ন উগ্ৰপন্থী সংগঠনত যোগদান কৰিছে। খোদ ৰাজ্যৰ মুখ্যমন্ত্ৰী হিমন্ত বিশ্ব শৰ্মাই আজি বিধানসভাত এই তথ্য সদৰী কৰিছে।
বিধানসভাত বিৰোধী দল কংগ্ৰেছে উত্থাপন কৰা এক প্ৰশ্নৰ উত্তৰত মুখ্যমন্ত্ৰীগৰাকীয়ে উল্লেখ কৰা মতে ২০১৬ চনৰ পৰা ৰাজ্যখনৰ মুঠ ১৫৬১ গৰাকী যুৱক-যুৱতীয়ে পাঁচটা পৃথক উগ্ৰপন্থী সংগঠনত যোগদান কৰিছে।
মুখ্যমন্ত্ৰী শৰ্মাই দিয়া তথ্য অনুসৰি ২০১৬ চনৰ পৰা ২০২২ চনলৈ সৰ্বাধিক ৮১১ গৰাকীয়ে এন ডি এফ বিত যোগদান কৰিছিল। আনহাতে আলফা (স্বাধীন)ত যোগদান কৰিছে ২০৩ গৰাকী যুৱক-যুৱতীয়ে।
সেইদৰে ১৬৪ গৰাকীয়ে এনএলএফবিত, ৩৫১ গৰাকীয়ে পিডিচিকেত আৰু ৩২ গৰাকী যুৱক-যুৱতীয়ে ইউপিআৰএফত যোগদান কৰিছে বুলি কংগ্ৰেছ বিধায়ক দেৱব্ৰত শৰ্মাৰ প্ৰশ্নৰ লিখিত উত্তৰত মুখ্যমন্ত্ৰী শৰ্মাই কয়।
মুখ্যমন্ত্ৰী গৰাকীয়ে লগতে একে সময়তে বিভিন্ন উগ্ৰপন্থী সংগঠনৰ প্ৰায় ৮০০০ সদস্যই অস্ত্ৰ সম্বৰণ কৰি অহিংস পথলৈ ঘূৰি আহিছে বুলিও উল্লেখ কৰে।
ইফালে ২০১৬ চনৰ পৰা জেহাদী কাৰ্যকলাপৰ অভিযোগত ৰাজ্যত মুঠ ৮৪ জন লোককো আৰক্ষীয়ে গ্ৰেপ্তাৰ কৰিছে বুলি মুখ্যমন্ত্ৰী শৰ্মাই লগতে কয়।
