ভোটাৰ তালিকা সংশোধন আৰু নৱপ্ৰজন্মৰ ভোটাৰৰ নাম পঞ্জীয়ন বন্ধ হৈ পৰা বুলি শেহতীয়াকৈ উত্থাপিত হোৱা জল্পনা-কল্পনাক সম্পূৰ্ণৰূপে নাকচ কৰিছে ভাৰতৰ নিৰ্বাচন আয়োগে। শুকুৰবাৰে নিৰ্বাচন আয়োগৰ বিষয়াসকলে সুনিৰ্দিষ্ট তথ্য দাঙি ধৰি প্ৰকাশ কৰে যে ২০২৫ চনৰ পাছত সমগ্ৰ দেশত আৰম্ভ হোৱা এছ আই আৰ প্ৰক্ৰিয়াৰ জৰিয়তে এতিয়ালৈকে ১৮ ৰ পৰা ২৮ বছৰ বয়সৰ মুঠ ২ কোটি ৭৩ লাখ নতুন জেন জি বা তৰুণ ভোটাৰক সফলতাৰে ভোটাৰ তালিকাত অন্তৰ্ভুক্ত কৰা হৈছে। যুৱপ্ৰজন্মৰ ভোটাধিকাৰ লাভৰ ক্ষেত্ৰত জটিলতাৰ সৃষ্টি হোৱা বুলি যি অভিযোগ উঠিছিল, সেয়া নিৰ্বাচন আয়োগে এই তথ্যৰে নস্যাৎ কৰিছে।
আয়োগৰ প্ৰশাসনিক বিষয়াসকলে স্পষ্টভাৱে জানিবলৈ দিয়ে যে বাৰ্ষিক ভোটাৰ তালিকা প্ৰকাশৰ নিৰ্দিষ্ট সময়সীমাৰ বাহিৰেও ভোটাৰ তালিকাত নাম অন্তৰ্ভুক্ত কৰাৰ সুবিধা নিৰৱচ্ছিন্নভাৱে চলি থাকে। যাৰ ফলত যিকোনো যোগ্য যুৱক বা নাগৰিকে প্ৰয়োজনীয় আবেদন পত্ৰৰ জৰিয়তে নিজৰ নাম পঞ্জীয়ন কৰিব পাৰে। আয়োগৰ সূত্ৰ অনুসৰি, প্ৰকাশিত এই ২.৭৩ কোটি নতুন পৰিসংখ্যাৰ ভিতৰত ১৮ বছৰ সম্পূৰ্ণ কৰা নতুন ভোটাৰ থকাৰ লগতে পূৰ্বতে ভোটাধিকাৰ লাভ কৰিও বিশেষ কাৰণত নাম নথকা বা পৰৱৰ্তী সময়ত সংশোধিত হোৱা অন্যান্য যুৱ ভোটাৰৰ নামো অন্তৰ্ভুক্ত আছে। নিৰ্বাচন আয়োগে লগতে মনত পেলাই দিয়ে যে নতুন ভোটাৰ হিচাপে নাম পঞ্জীয়নৰ বাবে নিৰ্দিষ্ট ফৰ্ম ৬ পূৰণ কৰাৰ সুবিধা গোটেই বছৰ জুৰি মুকলি থাকে। আয়োগৰ মতে এছ আই আৰ চলি থকাৰ সময়তো প্ৰযুক্তিগত আৰু প্ৰশাসনিক ব্যৱস্থাৰ জৰিয়তে যুৱপ্ৰজন্মক এই ব্যৱস্থাৰ আওতালৈ অনাৰ কাম নিৰৱচ্ছিন্নভাৱে চলি আছিল।
সাধাৰণতে মে’ মাহৰ শেষৰ ফালে নিৰ্বাচন আয়োগে প্ৰতি বছৰৰ এছ এছ আৰ প্ৰক্ৰিয়াৰ দিন ঘোষণা কৰে। এই নিৰ্দিষ্ট বাৰ্ষিক কাৰ্যসূচীৰ জৰিয়তে বছৰৰ চাৰিটা ভিন্ন তাৰিখত অৰ্থাৎ ১ জানুৱাৰী, ১ এপ্ৰিল, ১ জুলাই আৰু ১ অক্টোবৰত ১৮ বছৰ সম্পূৰ্ণ কৰা যুৱক-যুৱতীসকলে পোণপটীয়াভাৱে ভোটাৰ তালিকাত নাম অন্তৰ্ভুক্ত কৰাৰ বাবে আবেদন কৰিব পাৰে।
কিন্তু এক সংবাদ মাধ্যমৰ প্ৰতিবেদন অনুসৰি ২০২৪ চনৰ পৰা ২০২৬-২৭ বিত্তীয় বৰ্ষৰ বাবে কোনো এছ এছ আৰ ঘোষণা কৰা হোৱা নাই। প্ৰতিবেদনত দাবী কৰা হৈছে যে দুজন নিৰ্বাচন আয়ুক্ত সুখবীৰ সিং সান্ধু আৰু বিবেক যোশীয়ে এছ এছ আৰ প্ৰক্ৰিয়া পুনৰ দ্ৰুতভাৱে আৰম্ভ কৰাৰ পোষকতা কৰিছিল যদিও মুখ্য নিৰ্বাচন আয়ুক্ত জ্ঞানেশ কুমাৰে তাত সন্মতি প্ৰদান কৰা নাছিল। আনকি চলি থকা এছ আই আৰ প্ৰক্ৰিয়াৰ মাজত এছ এছ আৰৰ প্ৰয়োজন আছে নে নাই সেই সন্দৰ্ভত আইনী পৰামৰ্শও বিচাৰিছে মুখ্য নিৰ্বাচন আয়ুক্তগৰাকীয়ে। এই প্ৰতিবেদন পোহৰলৈ অহাৰ লগে লগে ছচিয়েল মিডিয়াত সৰৱ হৈ পৰিছে কংগ্ৰেছ। বিৰোধী দলটোৱে অভিযোগ কৰিছে যে চৰকাৰে জেন জি ভোটাৰসকলক ভয় কৰিছে আৰু মুখ্য নিৰ্বাচন আয়ুক্তৰ সৈতে মিলি ষড়যন্ত্ৰ ৰচনা কৰিছে। আগন্তুক বৰ্ষত উত্তৰ প্ৰদেশ আৰু গোৱাত বিধানসভা নিৰ্বাচন অনুষ্ঠিত হ’ব বুলি উল্লেখ কৰি কংগ্ৰেছে অভিযোগ কৰিছে যে তাত এছ এছ আৰ নোহোৱাৰ বাবে হাজাৰ হাজাৰ নতুন ভোটাৰে তালিকাত অন্তৰ্ভুক্ত হ’বলৈ সক্ষম হোৱা নাই।
