উত্তৰ-পূব ভাৰতত বসবাস কৰা প্ৰায় ২৫০ জন ইহুদী ইজৰাইলত উপস্থিত হৈছে। ইজৰাইল চৰকাৰে যোৱা বছৰ ভাৰতত বসবাস কৰা ইহুদীসকলক ঘূৰাই নিয়াৰ অভিযান ঘোষণা কৰিছিল। এই প্ৰসংগত ইজৰাইল চৰকাৰে ২০২৫ চনৰ নৱেম্বৰ মাহত কৈছিল যে পাঁচ বছৰৰ ভিতৰত ইজৰাইললৈ প্ৰব্ৰজন কৰিবলৈ হাজাৰ হাজাৰ ইহুদীক ধন আগবঢ়াব।
এনে পৰিপ্ৰেক্ষিতত যোৱা বৃহস্পতিবাৰে বিন-ই-মানেচেত উপস্থিত হৈছে ২৫০ জন ভাৰতীয় ইহুদী। এই ইহুদীসকলে আগতে মণিপুৰ আৰু মিজোৰামত বাস কৰিছিল।
ভাৰতৰ পৰা ইজৰাইললৈ যোৱা ইহুদীসকলে দাবী কৰে যে তেওঁলোকৰ পূৰ্বপুৰুষসকল বাইবেলত উল্লেখ কৰা মানচে জনগোষ্ঠীৰ আছিল। এই মনচি জনগোষ্ঠীৰ লোকসকলে নব্বৈৰ দশকৰ পৰা ক্ৰমান্বয়ে ইজৰাইললৈ গুচি আহিছে।
যোৱা তিনিটা দশকত এই সম্প্ৰদায়ৰ প্ৰায় ৪ হাজাৰ সদস্যই ইজৰাইলত উপস্থিত হৈছে। এই সম্প্ৰদায়ৰ বাকীসকলক ইজৰাইললৈ অনাৰ বাবে ইজৰাইল চৰকাৰে অপাৰেচন উইংছ অৱ ডন আৰম্ভ কৰিছিল। ইয়াৰ অধীনত নেতানিয়াহু চৰকাৰে ২০২৬ চনৰ ভিতৰত আৰু ১২০০ জন লোকক ইজৰাইললৈ অনাৰ পৰিকল্পনা কৰিছে।
সমগ্ৰ পুনৰ সংস্থাপন পৰিকল্পনাৰ বাজেট প্ৰায় নব্বৈ মিলিয়ন চেকেল (তিনি মিলিয়ন মাৰ্কিন ডলাৰ)। প্ৰসংগক্ৰমে মানচে জাতিৰ লোকসকল ইহুদী হোৱাৰ বিষয়ে বহু বিতৰ্ক হৈছে। কিন্তু ২০০৫ চনত চেফাৰ্ডি সম্প্ৰদায়ৰ মুৰব্বী ৰাব্বি শ্লোমো আমৰে তেওঁলোকক ‘ইজৰাইলৰ বংশধৰ’ হিচাপে স্বীকৃতি দিয়ে।
কোৱা হয় যে মানচে সম্প্ৰদায়ৰ সদস্যসকলে শতিকাজুৰি পাৰস্য, আফগানিস্তান, তিব্বত আৰু চীনলৈ প্ৰব্ৰজন কৰিছিল। ২৭০০ বছৰ পূৰ্বে গৃহভূমিৰ পৰা নিৰ্বাসিত হৈছিল। এই সময়ছোৱাত উত্তৰ-পূব ভাৰততো বহু মানচে বসবাস কৰিছিল।
ইহুদী সংগঠন এটাই কয় যে ভাৰতৰ মিছনেৰীসকলে মানচেক খ্ৰীষ্টান ধৰ্মলৈ ধৰ্মান্তৰিত কৰিছিল। এই পৰিস্থিতিত তেওঁলোকে এতিয়া ইজৰাইলৰ নাগৰিক হ’বলৈ পুনৰ ধৰ্মান্তৰকৰণ প্ৰক্ৰিয়াৰ মাজেৰে পাৰ হ’ব লাগিব।
