দেশত যোৱা কিছু দিনৰ পৰা সাংঘাটিকভাৱে বৃদ্ধি পাবলৈ ধৰিছে ক’ৰ’নাৰ সংক্ৰমণ। ২৪ ঘণ্টাৰ অন্তৰালত স্বাস্থ্য মন্ত্ৰ্যালয়ে জাৰি কৰি থকা তথ্যই ভয়ংকৰ ভৱিষ্যতৰ ইংগিত প্ৰদান কৰিছে।
বৃহস্পতিবাৰে স্বাস্থ্য মন্ত্ৰ্যালয়ে জানিব দিয়া মতে, ভাৰতত বিগত ২৪ ঘণ্টাত ৪৫,৭২০ গৰাকী লোক ক’ৰ’নাত আক্ৰান্ত হৈছে। আনহাতে যোৱা ২৪ ঘণ্টাত মৃত্যু হৈছে ১,১২৯ গৰাকী ৰোগী।
সংক্ৰমণৰ দিশৰ পৰা চাব গ’লে ভাৰতত এটা দিনত ক’ৰ’নাৰ এইটোৱেই সৰ্বাধিক সংখ্যা।
দেশত এতিয়া ক’ৰ’না আক্ৰান্ত ৰোগীৰ সংখ্যা হৈছে ১২,৩৮,৬৩৫ গৰাকী আৰু মৃত্যু হৈছে ২৯,৮৬১ গৰাকী।
উল্লেখ্য যে দেশত এতিয়া ৪,২৬,১৬৭ গৰাকী ৰোগী চিকিৎসাধীন হৈ থকাৰ বিপৰীতে ৭,৮২,৬০৭ গৰাকী ৰোগী ক’ৰ’না মুক্ত হৈছে।
ক’ৰ’নাৰ সংহাৰ হ্ৰাস নাপালেও ভাৰতৰ বাবে এটাই সুখবৰ যে ক’ৰ’নাৰ চিকিৎসা চলি থকা ৰোগীৰ সংখ্যাতকৈ ক’ৰ’না মুক্তৰ সংখ্যা অধিক।
ইফালে ২২ জুলাইলৈকে দেশত মুঠ ১,৫০,৭৫,৩৬৯ গৰাকী লোকক ক’ভিড টেষ্ট কৰা হৈছে। এই তথ্য প্ৰদান কৰিছে আই চি এম আৰ-এ।
যোৱা ২৪ ঘণ্টাত ৩,৫০,৮২৩ গৰাকী লোকক টেষ্ট কৰা হৈছে।
ইফালে ৰাজ্যৰ ভিতৰতে মহাৰাষ্ট্ৰত সৰ্বাধিক ক’ৰ’না আক্ৰান্ত থকাৰ বিপৰীতে দ্বিতীয় স্থনত আছে তামিলনাডু, তৃতীয় স্থানত আছে কৰ্ণাটক, চতুৰ্থ স্থানত অন্ধ্ৰ প্ৰদেশ আৰু পঞ্চম স্থানত আছে দিল্লী।
