প্ৰধানমন্ত্ৰী নৰেন্দ্ৰ মোদীয়ে ২০২৪ চনত ১৬খন দেশ ভ্ৰমণ কৰিছিল। কিন্তু মস্কো আৰু আবুধাবিৰ বাহিৰে আন ঠাইত থকা ভাৰতীয় দূতাবাসে এই ভ্ৰমণৰ খৰচৰ বিষয়ে কোনো তথ্য প্ৰকাশ কৰা নাই।
স্বচ্ছতাৰক্ষা কৰ্মী তথা অৱসৰপ্ৰাপ্ত সেনা বিষয়া লোকেশ বাট্ৰাই তথ্য জনাৰ অধিকাৰ আইন (আৰ টি আই)ৰ অধীনত প্ৰধানমন্ত্ৰী মোডীৰ বিদেশ ভ্ৰমণৰ সৈতে জড়িত খৰচৰ ৰেকৰ্ড বিচাৰিছিল।
তাৰ পৰাই জানিব পৰা গৈছে যে ২০২৪ চনত প্ৰধানমন্ত্ৰীগৰাকীৰ ৰাছিয়া ভ্ৰমণৰ বাবে ১৫ কোটি টকাৰো অধিক খৰচ হৈছিল। ইয়াৰ উপৰিও আবুধাবি দূতাবাসে ৫ কোটি টকা ব্যয় দেখুৱাইছে। অৰ্থাৎ কেৱল এই দুই ঠাইলৈ যাত্ৰাত ২০ কোটিতকৈ অধিক টকা খৰচ হৈছিল। ইয়াৰে ১.৮৭ কোটি টকা জুলাই মাহৰ মস্কো ভ্ৰমণৰ সময়ত কমিউনিটি ৰিচেপছনত ব্যয় কৰা হৈছিল।
বিষয়টো পোহৰলৈ অহাৰ পিছতে বিৰোধীয়ে অভিযোগ কৰিছে যে ৰাজকোষৰ পৰা এই বৃহৎ ব্যয় সামূহিক অভ্যৰ্থনাৰ অজুহাতত প্ৰকৃততে ৰাছিয়াৰ মাটিত ‘মোডী-বন্দনা’ অনুষ্ঠান অনুষ্ঠিত কৰাৰ বাবেহে কৰা হৈছে। কেৱল সেয়াই নহয়, এই প্ৰশ্নও উত্থাপন হৈছে যে মস্কো আৰু আবুধাবিৰ বাহিৰে আন কোনো দূতাবাসে কিয় মোডীৰ ভ্ৰমণৰ খৰচৰ সন্দৰ্ভত তথ্য প্ৰকাশ কৰা নাই।
২০২৪ চনত প্ৰধানমন্ত্ৰী মোদীয়ে ভূটান, কুৱেইট, ইউক্ৰেইন, ৰাছিয়া, সংযুক্ত আৰব আমিৰশ্বাহী, আমেৰিকাকে ধৰি মুঠ ১৬খন দেশ ভ্ৰমণ কৰিছিল।
অৱসৰপ্ৰাপ্ত সেনা বিষয়া লোকেশ বাট্ৰাই দাবী কৰিছে যে আৰ টি আইৰ আবেদনৰ ভিত্তিত খৰচৰ সবিশেষ তথ্য কেৱল মস্কো আৰু আবুধাবিৰ দূতাবাসেহে প্ৰদান কৰিছে। তেওঁ অভিযোগ কৰে যে আন দূতাবাসসমূহে খৰচৰ আনুমানিক হিচাপ নিদিয়াকৈ বৈদেশিক মন্ত্ৰালয়ৰ আদালতত বলটো ঠেলি দিছে।
বাট্ৰাই কয় যে ২০১৫ চনত অনুৰূপ আৰ টি আই আবেদনত বিতং তথ্য প্ৰদান কৰা দূতাবাসসমূহে এতিয়া আচৰিত ধৰণে খৰচৰ কথা প্ৰকাশ কৰিবলৈ অস্বীকাৰ কৰিছে। কিন্তু এই দূতাবাসসমূহে উদ্যোগ ল’ব লাগিছিল আৰু তেওঁলোকৰ খৰচৰ হিচাপ ৰাজহুৱা কৰিব লাগিছিল।
আনহাতে, আন চহৰৰ দূতাবাসসমূহ বাদ দিয়া হৈছে যদিও মস্কো আৰু আবুধাবিত থকা ভাৰতীয় দূতাবাসসমূহে বিশদ খৰচৰ হিচাপ দাখিল কৰিছে। ইয়াৰ পৰা দেখা যায় যে ২০২৪ চনত প্ৰধানমন্ত্ৰী মোডীৰ ৰাছিয়া ভ্ৰমণৰ দুটা ভ্ৰমণৰ ভিতৰত প্ৰথমটো আছিল ৮ জুলাইৰ পৰা ১০ জুলাইলৈ। একে সময়তে তেওঁ অষ্ট্ৰিয়া ভ্ৰমণো কৰিছিল। সেই ভ্ৰমণৰ খৰচ আছিল ৫.১২ কোটি টকা।
ব্ৰিকছ সন্মিলন উপলক্ষে ২২-২৩ অক্টোবৰত তেওঁ পুনৰ ৰাছিয়া ভ্ৰমণ কৰিছিল। মুঠ খৰচ ১০.২৪ কোটি। আনহাতে, ২০২৪ চনৰ ১৩ ফেব্ৰুৱাৰীৰ পৰা ১৫ ফেব্ৰুৱাৰীলৈকে সময়ছোৱা সংযুক্ত আৰব আমিৰশ্বাহী আৰু কাটাৰ ভ্ৰমণৰ মুঠ খৰচ আছিল ৪.৯৫ কোটি টকা।
দেশৰ জনতাই অন্ন, সংস্থান আৰু নিজৰ উত্তৰ পুৰুষৰ ভৱিষ্যতকলৈ উদ্বিগ্ন হৈ থকাৰ সময়ত দেশৰ প্ৰধানমন্ত্ৰীগৰাকীৰ এনে ব্যয়বহুল বিদেশ ভ্ৰমণৰ প্ৰয়োজনীয়তাক লৈ প্ৰশ্ন উত্থাপন হৈছে। প্ৰশ্ন হৈছে এই বিলাসী ভ্ৰমণে কঢ়িয়াই অনা ফলাফল অশ্বডিম্বৰ বাহিৰে আৰুনো কি?
