আই এন এক্স মিডিয়া গোচৰত প্ৰাক্তন গৃহ মন্ত্ৰী পি চিদাম্বৰমে উচ্চতম ন্যায়ালয়ৰ পৰা জামিন লাভ কৰিছে। চিবিআইৰ গোচৰটোত পি চিদাম্বৰমে এক লাখ টকাৰ ব্যক্তিগত বণ্ডৰ বিনিময়ত জামিন লাভ কৰে।
এই জদামিন লাভ কৰাৰ পাছতো চিদাম্বৰম তিহাৰ জেইলতে থাকিব। কিয়নো তেওঁ ২৪ অক্টোবৰ পৰ্যন্ত ই ডিৰ জিম্মাত আছে।
চিবিআই আদালতে আই এন এক্স মিডিয়া গোচৰত সোমবাৰে চিদাম্বৰমৰ বিৰুদ্ধে চাৰ্জশ্বিটৰ শুনানি গ্ৰহণ কৰিছিল। আদালতে প্ৰাক্তন মন্ত্ৰীগৰাকীক ২৪ অক্টোবৰত হাজিৰ হ’বলৈ নিৰ্দেশ দিয়ে।
চিবিআইয়ে শুকুৰবাৰে চিদাম্বৰম, তেওঁৰ পুত্ৰ তাৰ্তি আৰু আনসকলৰ বিৰুদ্ধে অভিযোগনামা দাখিল কৰিছিল।
অভিযোগনামাত চিবিআইয়ে পীটাৰ মুখাৰ্জী, কাৰ্তি চিদাম্বৰম, পি চিদাম্বৰম, কাৰ্তিৰ একাউন্টেন্ট ভাস্কৰ, কেইজনমান কৰ্মচাৰীকে ধৰি ১৪জন লোকৰ নাম সন্নিৱিষ্ট কৰিছে।
এজেন্সিটোৱে আই এন এক্স মিডিয়া, চেছ মেনেজমেন্ট আৰু এএছছিয়েল কোম্পানীৰ নামো সন্নিৱিষ্ট কৰে।
পি চিদাম্বৰম দিৱালীলৈকে জেইলতে থাকিব। দিৱালীৰ পূৰ্বে ২৪ অক্টোবৰ পৰ্যন্ত চিদাম্বৰম ই ডিৰ জিম্মাত থাকিব।
পৰৱৰ্তী সাতদিনলৈকে ই ডিয়ে জিম্মা বৃদ্ধি কৰাৰ আবেদন জনাব বুলি জানিব পৰা গৈছে। যদি তিনিদিনলৈ চিদাম্বৰমৰ জিম্মা বৃদ্ধি কৰে তেতিয়াহ’লে তেওঁ জেইলতে থাকিব লাগিব।