“পৰিবেশ সংৰক্ষণৰ সজাগতাৰ বাবে সংবাদমাধ্যমৰ ভূমিকা অপৰিসীম”-পদ্মশ্ৰী যাদৱ পায়েং
অধ্যয়ন চক্ৰ টীয়ক আৰু ইংলিছ ষ্টাডী এণ্ড লিটাৰেৰী ফ’ৰাম কাকজান কলেজৰ যৌথ উদ্যোগত তথা কাৱৈমাৰী উচ্চতৰ মাধ্যমিক বিদ্যালয়ৰ সহযোগত কাৱৈমাৰী উচ্চতৰ মাধ্যমিক বিদ্যালয়ৰ প্ৰেক্ষাগৃহত বিশ্ব পৰিবেশ দিৱসৰ সপ্তাহযোৰা কাৰ্যসূচীৰ অন্তিমটো কাৰ্যসূচী সোমবাৰে ৰূপায়ন হয়।
কাকজান মহাবিদ্যালয়ৰ ইংৰাজী বিভাগৰ সহকাৰী অধ্যাপক ভৈৰবানন্দ বৰাই আঁতধৰা তথা কাৱৈমাৰী উচ্চতৰ মাধ্যমিক বিদ্যালয়ৰ অধ্যক্ষ ৰঞ্জিত দত্তৰ সভাপতিত্বত অনুষ্ঠিত এই সভাত কাকজান মহাবিদ্যালয়ৰ ইংৰাজী বিভাগৰ মুৰব্বী অধ্যাপক ড° পংকজ গোস্বামী বিশেষ অতিথি হিচাপে উপস্থিত থাকে।
উক্ত সভাত মুখ্য অতিথি হিচাপে ভাৰতবৰ্ষৰ অৰণ্য-মানৱ পদ্মশ্ৰী যাদৱ পায়েং উপস্থিত থাকি পৃথিৱীৰ সেউজীয়াকৰণৰ ওপৰত গুৰুত্বপূৰ্ণ মন্তব্য আগবঢ়াই লগতে দুয়োটা শিক্ষানুষ্ঠানৰ ছাত্ৰ-ছাত্ৰীসকল তথা উপস্থিত ৰাইজৰ সৈতে সেউজ পৰিবেশ গঢ়ি তোলাৰ অৰ্থে বাৰ্তালাপত মিলিত হয়।
ছাত্ৰ-ছাত্ৰীসকলক আজি কিদৰে তেওঁ এই স্থানত উপনীত হৈছে তাৰ আভাস দিয়ে। লগতে বিশ্বৰ প্ৰতিগৰাকী মানুহকে বছৰি এটাকৈ গছপুলি ৰোপণ কৰি পৰিবেশ সংৰক্ষণত অৰিহণা যোগাবলৈ আহ্বান জনায়।
ইপিনে পৰিবেশ সজাগতা সৃষ্টিৰ ক্ষেত্ৰত বিশেষকৈ স্কুলীয়া ছাত্ৰ-ছাত্ৰীৰ লগতে সংবাদ মাধ্যমৰ ভূমিকাও অধিক গুৰুত্বপূৰ্ণ বুলিও ভাষণ প্ৰসংগত অৰণ্য মানৱগৰাকীয়ে সদৰি কৰি এইদৰে সজাগতা সৃষ্টি কৰিবলৈ আয়োজন কৰা উক্ত সভাৰ উদ্যোক্তাসকলক ধন্যবাদ জ্ঞাপন কৰে।
উক্ত অনুষ্ঠানত কাকজান মহাবিদ্যালয়ৰ অধ্যাপক তুফেল জিলানী, বিশিষ্ট শিক্ষক ৰমেন শৰ্মা, অধ্যয়ন চক্ৰ টীয়কৰ হৈ দ্বীপজ্যোতি শইকীয়া, চন্দন জ্যোতি ভুঞা, ৰেঙণিৰ সঞ্চালক বিজু কুমাৰ শৰ্মা, বিনীতা শইকীয়া, ছাত্ৰনেতা ৰন্টু ভুঞা, যদুমণি বৰুৱাকে প্ৰমুখ্য কৰি ভালেসংখ্যক গণ্য মান্য ব্যক্তি উপস্থিত থাকি সহযোগিতা আগবঢ়ায়।
উল্লেখযোগ্য যে উক্ত সভা আৰম্ভণিৰ প্ৰাকক্ষণত বিদ্যালয়ৰ চৌহদত অৰণ্য মানৱ যাদৱ পায়েঙে এটি গছপুলি ৰোপণ কৰি অনুষ্ঠানটিৰ শুভাৰম্ভ কৰে। অনুষ্ঠানৰ শেষত কাকজান মহাবিদ্যালয়ৰ ইংৰাজী বিভাগৰ ছাত্ৰ-ছাত্ৰীসকলে পৰিবেশ সংৰক্ষণৰ ওপৰত এখনি নাটক প্ৰদৰ্শন কৰি অনুষ্ঠানটিৰ সফল সমাপ্তি ঘটায়।