পেহেলগাম আক্ৰমণৰ মাষ্টাৰমাইণ্ড সন্ত্ৰাসবাদীক পুনৰ পাকিস্তানত ৰাজহুৱা সভা অনুষ্ঠিত কৰা দেখা গ’ল। বুধবাৰে এখন বৈঠকত উপস্থিত থাকে লস্কৰ-ই-তৈবাৰ (LeT)ৰ কমাণ্ডাৰ ছাইফুল্লাহ কাছুৰী। সেই বৈঠকত পাকিস্তানী ৰাজনীতিবিদসকলো উপস্থিত আছিল। এই ছবিখনে দেখুৱাইছে যে পাকিস্তান চৰকাৰে এতিয়াও সন্ত্ৰাসবাদ বন্ধ কৰাৰ কোনো পদক্ষেপ গ্ৰহণ কৰা নাই।
১৯৯৮ চনৰ ২৮ মে’ত বেলুচিস্তানত হোৱা পাঁচটা ভূগৰ্ভস্থ পাৰমাণৱিক পৰীক্ষাৰ স্মৃতিত পাকিস্তানে ২৭ বছৰীয়া ‘য়ুম-ই-টাকবীৰ’ বা ‘মহানতা দিৱস’ পালন কৰিছে।
বুধবাৰে পঞ্জাৱ প্ৰদেশৰ কাছুৰত পাকিস্তান মাৰ্কাজি মুছলিম লীগ (পিএমএমএল)ৰ উদ্যোগত আয়োজিত এক সমাৱেশত উত্তেজক ভাষণ আৰু ভাৰত বিৰোধী শ্লোগান দিয়া হয়। সেই বৈঠকত উপস্থিত থকাসকলৰ ভিতৰত আছিল লস্কৰ-ই-তৈবাৰ প্ৰতিষ্ঠাপক হাফিজ ছাইদৰ পুত্ৰ সন্ত্ৰাসবাদী তালহা ছাইদ। তেওঁ ভাৰত বিৰোধী শ্লোগান দিয়ে।
সমাৱেশত কাছুৰীয়ে কয় যে, ” মোক পেহেলগাম সন্ত্ৰাসবাদী আক্ৰমণৰ মাষ্টাৰমাইণ্ড বুলি অভিযোগ উঠিছিল, এতিয়া মোৰ নাম সমগ্ৰ বিশ্বতে বিখ্যাত হৈছে।” সভাত ভাষণ দি কাছুৰী ওৰফে খালিদে এলাহাবাদত এটা কেন্দ্ৰ, পথ আৰু ‘মুদাছিৰ শ্বহীদ’ নামেৰে এখন চিকিৎসালয় নিৰ্মাণৰ পৰিকল্পনাৰ কথা ঘোষণা কৰে।
চোৰাংচোৱা সূত্ৰৰ পৰা জানিব পৰা মতে, পেহেলগাম হত্যাকাণ্ডৰ পাছত ভাৰতৰ প্রত্যুত্তৰ অভিযানত নিহত হোৱা কেইবাজনো হাই-প্ৰফাইল সন্ত্ৰাসবাদীৰ ভিতৰত মুদাছিৰ আহমেদ অন্যতম।
হাফিজ ছাইদৰ পুত্ৰ সন্ত্ৰাসবাদী তালহা ছাইদে ২০২৪ চনৰ পাকিস্তানৰ সাধাৰণ নিৰ্বাচনত লাহোৰৰ এন এ-১২২ সমষ্টিৰ পৰা প্ৰতিদ্বন্দ্বিতা আগবঢ়াইছিল। যদিও তেওঁ পৰাস্ত হয়, তথাপিও তেওঁ নিষিদ্ধ এলইটি-ৰ ৰাজনৈতিক ফ্ৰণ্ট হিচাপে পৰিচিত পিএমএমএলৰ সৈতে সম্পৰ্ক বজাই ৰাখিছে।
ভাৰত বিৰোধী অভিযান তীব্ৰতৰ কৰি তুলিছে পিএমএমএলে। পাকিস্তানৰ প্ৰধান চহৰ – লাহোৰ, কৰাচী, ইছলামবাদ, ফৈছালাবাদ আদি ঠাইত হাফিজ ছাইদৰ মুক্তিৰ দাবীত প্ৰতিবাদ সাব্যস্ত কৰিছে। ইয়াৰ উপৰিও ভাৰতে সিন্ধু জল চুক্তি স্থগিত ৰখাৰ অভিযোগ উত্থাপন কৰিছে।
যদিও আন্তঃৰাষ্ট্ৰীয় আৰু পাকিস্তানৰ ভিতৰত লস্কৰ ই তৈবা নিষিদ্ধ, পিএমএমএলৰ দৰে গোটে সন্ত্ৰাসবাদী সংগঠনটোৰ ৰাজনৈতিক আৰু মতাদৰ্শগত প্ৰাসংগিকতা বজাই ৰাখিবলৈ সক্ষম হৈছে। ২০০৮ চনৰ মুম্বাই আক্ৰমণৰ মাষ্টাৰমাইণ্ড হাফিজ ছাইদক এতিয়াও পিএমএমএলৰ কাৰ্যকলাপৰ আঁৰৰ মতাদৰ্শগত শক্তি হিচাপে দেখা যায়।
