প্ৰথমতে গৌৰৱ গগৈৰ পাকিস্তান ভ্ৰমণৰ বিষয়ে মুখ্য মন্ত্ৰীৰ বিচিত্ৰ অভিযোগ শুনি ভাবিছিলো যে এইটো এটা সস্তীয়া নিৰ্বাচনী গাজা। এনে সময়তে এটা পুণ্যবান মহলৰ পৰা বিৰোধী পক্ষৰ বিৰুদ্ধে নানা কলংক ৰটনা হয়েই। দুদিন পাছত নিজে নিজে ঠাণ্ডা হয়।
কিন্তু এইবাৰতো মুখ্যমন্ত্ৰীৰ গেছ বেলুনটোৰ পাম নগ‘ল। নতুন নতুন ৰোমহৰ্ষক খুটি-নাটি উলিয়াবলৈ ধৰিলে। অৱশেষত পুৰা আইএছআইৰ এজেণ্ট ,সজাইহে এৰিলে। এই অভিযোগৰ সমৰ্থনত ৰঙ বিৰঙৰ মনোহাৰী তথ্য প্ৰতিদিনেই প্ৰকাশ কৰি আছে মুখ্যমন্ত্ৰী জনে। তেওঁ নিজেই গঠন কৰি দিয়া SIT বা বিশেষ তদন্তকাৰী গোটে যোগান ধৰা প্ৰমাণ ৰাইজক দিনৌ জনাই আছে।
তেওঁ বাৰে বাৰে ভাবুকি দিয়াৰ দৰে কৈ আছে যে চেপ্তেম্বৰত সকলো কথা পৰিষ্কাৰ হ‘ব।ইঙ্গিত দিছে যে আৰক্ষীয়ে কিবা স্পষ্ট পদক্ষেপ ল’ব।এবাৰ নহয়,বাৰে বাৰে কৈ আছে। ঘাগু ৰাজনীতিবিদ হিচাপে তেওঁ বুজে যে এই ভাবুকি মিছা হ’লে তেওঁৰে ক্ষতি হ’ব। স্বাভাবিক হোৱা হলে ঘটনাই বেলেগ ৰূপ ললেহেতেন।উচ্চ আসনত থাকি শত্ৰু দেশৰ হৈ কোনোবাই গুপ্তচৰ বৃত্তি কৰি থকা বুলি এজন মুখ্য মন্ত্ৰীয়ে গম পালেই সেইটো কেন্দ্ৰৰ দায়িত্বশীল মহলক গোপনে জাননী দি তাৰ দ্বাৰা যথাযথ তদন্ত,জেৰা,আৰু গ্ৰেপ্তাৰ কৰালেহেতেন।এনে কামৰ বাবে কেন্দ্ৰৰ অধীনত বেলেগ সংস্থা আছে। সেই পিনে নগৈ ৰাজ্যিক আৰক্ষীক লগাই নিজেও চলন্ত ধাৰাভাষ্য দি থকাৰ অৰ্থ কি? অনুমান হয় যে অসমীয়া মানুহৰ মনত গৌৰৱ গগৈ সম্পৰ্কে কিছু সন্দেহৰ সৃষ্টি কৰাই মুখ্য মন্ত্ৰীৰ ধাৰাভাষ্যৰ অভিপ্ৰায়।যাতে মানুহৰ মনত তাৰ বিৰুদ্ধে সন্দেহ আৰু চেপ্তেম্বৰত গৌৰৱৰ বিৰুদ্ধে সঁচাকৈ এটা formal অভিযোগ উত্থাপন কৰা হ’ব পাৰে। অৰ্থাৎ এক সুদূৰপ্ৰসাৰী ষড়যন্ত্ৰ কৰা হৈছে নেকি? সাক্ষ্যপ্ৰমাণ? যদি ধৰা হয় যে সেইবোৰ প্ৰয়োজন অনুসৰি সজাই লোৱা হ’ব,বৰ আচৰিত নহ’ব।আৰক্ষী যে কেতিয়াবা তেনে ষড়যন্ত্ৰত জড়িত হয় যোৱা দশকত তেনে নজিৰ ওলাইছে।প্ৰমাণো এনে যে উচ্চ প্ৰযুক্তি ব্যৱহাৰ অবিহনে তাক বনাই লোৱা সম্ভৱ নহয়।
যদি সেইটোৱেই হয়,ৰাইজ যথাবিহিত সহাৰিৰ বাবে সাজু থাকিব লাগিব। কাৰণ ধাৰণা হয় বিজেপি তথা বৰ্তমান মুখ্যমন্ত্ৰী জনৰ বাবে গৌৰৱ গগৈ ঘোৰ দুশ্চিন্তাৰ কাৰণ হৈ পৰিছে।
ইতি
হীৰেন গোহাঁই
