দেওবাৰে পুৱতি নিশা পাকিস্তানে আফগান সীমান্তত বিমান আক্ৰমণ চলায়। পাকিস্তানে দাবী কৰিছে যে তেহৰিক-ই-তালিবান পাকিস্তানৰ ঘাটিত সংঘটিত হৈছে এই আক্ৰমণ। পাকিস্তানী সেনাই এই আক্ৰমণত কেইবা ডজনো টি টি পি যোদ্ধা নিহত হোৱা বুলিও জানিবলৈ দিয়ে।
ছ’চিয়েল মিডিয়াত ভাইৰেল হৈ পৰিছে বিমান আক্ৰমণৰ বহু ভিডিঅ’। ইফালে আফগান সংবাদ মাধ্যমে দাবী কৰিছে যে পাকিস্তানৰ আক্ৰমণত এখন মাদ্ৰাছা ধ্বংস হৈছে। মুঠতে পাকিস্তানে আফগানিস্তানৰ পাক্তিকাৰ বাৰমাল আৰু উৰগুন জিলা, নংগাৰহাৰৰ খোগ্যানী, বেহছুদ আৰু গনীখেলে জিলাবোৰত আক্ৰমণ চলায়। এই আক্ৰমণত ১৭ জন সাধাৰণ নাগৰিক নিহত হয়।
এই বিমান আক্ৰমণ আত্মঘাতী আক্ৰমণৰ প্ৰতিশোধ আছিল নেকি? জানিব পৰা মতে, শনিবাৰে পাকিস্তানৰ খাইবাৰ পখতুনখোৱাত সংঘটিত আত্মঘাতী আক্ৰমণৰ প্ৰতি সঁহাৰি জনাই এই বিমান আক্ৰমণ চলোৱা হৈছে। শনিবাৰে চোৰাংচোৱা অভিযানৰ সময়ত টিটিপিয়ে আত্মঘাতী আক্ৰমণ সংঘটিত কৰে। সেই আক্ৰমণত দুজন পাকিস্তানী নিৰাপত্তাৰক্ষী নিহত হৈছিল। আৰু সেই আক্ৰমণৰ ২৪ ঘণ্টা নৌহওঁতেই এই বিমান আক্ৰমণ সংঘটিত হৈছে।
উল্লেখ্য যে ২০২৫ চনত ডুৰাণ্ড লাইনৰ কাষত পাকিস্তানী আৰু আফগান সীমান্তৰক্ষী বাহিনীৰ মাজত হোৱা তীব্ৰ সংঘৰ্ষৰ কেন্দ্ৰবিন্দু আছিল ‘তেহৰিক-ই-তালিবান পাকিস্তান’।পাকিস্তানে দাবী কৰিছে যে আফগান তালিবানে টিটিপিক আশ্ৰয় দিছে। আৰু সেই উগ্ৰপন্থীয়ে তাৰপৰা পাকিস্তানত আক্ৰমণ চলাই আছে।
ইফালে, ইছলামিক ষ্টেটৰ দৰে উগ্ৰপন্থী সংগঠনক পাকিস্তান চৰকাৰ আৰু সেনাই সহায় কৰি থকা বুলি তালিবানৰ প্ৰতি অভিযোগ। ২০০৭ চনৰ ডিচেম্বৰ মাহত বাইতুল্লাহ মেহছুদৰ নেতৃত্বত পাকিস্তানৰ ফেডাৰেল প্ৰশাসিত জনজাতি এলেকাত বিভিন্ন উগ্ৰপন্থী গোটক একত্ৰিত কৰি টিটিপি গঠন কৰা হয়। এই গোটটোক আন্তঃৰাষ্ট্ৰীয় পৰ্যায়ত সন্ত্ৰাসবাদী সংগঠন হিচাপে চিনাক্ত কৰা হৈছে। আল কায়দাৰ উগ্ৰপন্থীৰ বিৰুদ্ধে পাকিস্তানৰ সামৰিক অভিযানৰ প্ৰতিক্ৰিয়া স্বৰূপে ইয়াৰ জন্ম হৈছিল। বৰ্তমান টি টি পিৰ মূল লক্ষ্য হৈছে পাকিস্তান চৰকাৰক আঁতৰাই নিজা মতাদৰ্শৰ ওপৰত ভিত্তি কৰি ইছলামিক শাসন ব্যৱস্থা স্থাপন কৰা।
এই পৰিস্থিতিত ২০২৫ চনৰ ৯ অক্টোবৰৰ মাজনিশা কাবুলৰ পূব অংশত এক শক্তিশালী বিস্ফোৰণ সংঘটিত হয়। তাৰ পিছত আফগানসকলে পাকিস্তান সীমান্তত থকা সেনাৰ আউটপোষ্টত আক্ৰমণ কৰি প্ৰতিশোধ লয়। সেই আক্ৰমণত ৫৮জন পাকিস্তানী সৈনিক নিহত হোৱা বুলি দাবী কৰিছিল তালিবানে। আনহাতে, পাকিস্তানী সেনাই নিজৰ ২৩ জন জোৱান নিহত বুলি দাবী কৰে।
ইয়াৰ পাছত ১৪ অক্টোবৰৰ নিশা পাকিস্তান-আফগানিস্তান সীমান্তত নতুন সংঘৰ্ষৰ সূচনা হয়। ইয়াত কমেও ১৫ জন আফগান সাধাৰণ নাগৰিক আৰু ৬ জন পাকিস্তানী অৰ্ধসামৰিক জোৱান নিহত হয়। পিছত নৱেম্বৰৰ আৰম্ভণিতে পাকিস্তানে আফগানিস্তানৰ স্পিন বাল্ডক অঞ্চলত পুনৰ গুলীচালনা কৰে। এইবাৰ পাকিস্তানে আফগান সীমান্তৰ সমীপৰ টিটিপি ঘাটিত বিমান আক্ৰমণ চলালে।
