ছ’চিয়েল মিডিয়াৰ একোটা পোষ্টেও যে কোনো লোকৰ জীৱন কাঢ়ি নিব পাৰে তাৰেই প্ৰমাণ পোৱা গ’ল পুনৰ।
তিনি জন লোকক ছ’চিয়েল মিডিয়াৰ পোষ্টৰ বাবেই আদালতে বিহিছে মৃত্যুদণ্ড।
কেৱল সেয়াই নহয়,এজন লোকক বিহা হৈছে ১০ বছৰৰ কাৰাদণ্ড।ঘটনাটো সংঘটিত হৈছে ভাৰতৰ চুবুৰীয়া ৰাষ্ট্ৰ পাকিস্তানত।
ইছলামাবাদৰ সন্ত্ৰাসবাদ বিৰোধী আদালতৰ ন্যায়াধীশ ৰাজা জাওৱাদ আব্বাছে তিনিজন লোক ক্ৰমে ৰাণা নৌমান ৰাফাকট,আব্দুল ৱাহিদ আৰু নাছিৰ আহমেদক ছ’চিয়েল মিডিয়াত ইছলামৰ বিৰুদ্ধে মন্তব্য কৰাৰ অপৰাধতে মৃত্যুদণ্ডৰে দণ্ডিত কৰে।
লোক কেইজনে ২০১৭ চনত ফেচবুক আৰু ইউটিউবৰ জৰিয়তে ধৰ্মক বিকৃত কৰি মন্তব্য তথা ভিডিঅ’ প্ৰচাৰ কৰিছিল। ইয়াৰ পিছতে ধৰ্ম বিদ্বেষৰ অভিযোগত তেওঁলোকক গ্ৰেপ্তাৰ কৰা হৈছিল।
অৱশেষত ইছলামাবাদৰ আদালতে লোক তিনিজনক মৃত্যুদণ্ডৰে দণ্ডিত কৰে।
আনহাতে শ্ৰেণীত ছাত্ৰ-ছাত্ৰীক পঢ়ুৱাই থকাৰ সময়তে ধৰ্ম বিৰোধী মন্তব্য কৰাৰ অভিযোগত পাকিস্তানৰ একেখন আদালতে উৰ্দু বিষয়ৰ শিক্ষক আনোৱাৰ আহমেদক ১০ বছৰৰ কাৰাদণ্ডৰে দণ্ডিত কৰাৰ লগতে ১ লাখ পাকিস্তানী টাকা জৰিমনা আদায় দিবলৈ নিৰ্দেশ দিছে।
উল্লেখ্য পাকিস্তানত ১৯৮০ চনত তদানীন্তন সামৰিক শাসক জিয়াউল হকৰ নিৰ্দেশত ধৰ্ম বিদ্বেষ প্ৰতিৰোধী আইন খন গ্ৰহণ কৰা হৈছিল। উক্ত আইনৰ ভিত্তিতে লোক কেইজনক শাস্তি বিহা হয়।