ক’ৰ’না ভাইৰাছ সংক্ৰমণ প্ৰতিৰোধ কৰাৰ ক্ষেত্ৰত পাকিস্তানত বহু পলমকৈ পদক্ষেপ গ্ৰহণ কৰা বুলি অভিযোগ তুলি বিভিন্নজনে দেশখনৰ চৰকাৰক তীব্ৰ সমালোচনা কৰিছে।
তথ্য অনুসৰি, এই পৰ্যন্ত দেশখনত ২৪০০ৰো অধিক লোক ক’ৰ’না ভাইৰাছত আক্ৰান্ত হৈছে আৰু ইয়াৰে ৩০ গৰাকীৰো অধিক লোকে প্ৰাণ হেৰুৱাইছে।
উল্লেখ্য যে চিয়া দৰ্শনাৰ্থীসকল ইৰাণৰ পৰা উভতি অহাৰ পিছতে পাকিস্তানত বৃহৎ সংখ্যক লোকৰ দেহত ক’ৰ’না ভাইৰাছৰ সংক্ৰমণ হৈছিল।
এই চিয়া দৰ্শনাৰ্থীসকল পৰীক্ষা নকৰাকৈয়ে শিবিৰত ৰখা হৈছিল, যাৰ পৰিণতিত দেশখনত অধিক হাৰত বৃদ্ধি পাবলৈ ধৰে ক’ৰ’না ভাইৰাছত আক্ৰান্তৰ সংখ্যা।
ইয়াৰ উপৰি মছজিদত সমূহীয়া নামাজ বন্ধ কৰাৰ ক্ষেত্ৰতো পাকিস্তান চৰকাৰে কোনো ধৰণৰ পদক্ষপ গ্ৰহণ কৰা পৰিলক্ষিত হোৱা নাই। যোৱা ২০ মাৰ্চ আৰু ২৭ মাৰ্চত মছজিদত বহু লোকে নামাজত অংশ লৈছিল।
বিভিন্ন সূত্ৰৰ পৰা প্ৰকাশ পোৱা তথ্য অনুসৰি বিভিন্ন শক্তিশালী ইছলামিক সংগঠনৰ ভয়ত পাকিস্তান চৰকাৰে মছজিদ আৰু ধৰ্মীয় অনুস্থান সমূহ বন্ধ কৰিব পৰা নাই।
অৱশ্যে বিভিন্ন সমালোচনাৰ অন্তত পাকিস্তান সেনাই ক’ৰ’না ভাইৰাছৰ সংক্ৰমণ প্ৰতিৰোধৰ বাবে শেহতীয়াকৈ দেশত কিছু যোগাত্মক পদক্ষেপ গ্ৰহণ কৰা বুলি জানিব পৰা গৈছে।