লাডাখ সীমান্তত চীন-ভাৰতৰ সংঘাত অব্যাহত থকাৰ মাজতে পাক-ভাৰত সীমান্তৰ নিয়ন্ত্ৰণ ৰেখাত পাকিস্তানে সেনা মোতায়েন কৰিছে। এই কথা জনাইছে ভাৰতীয় সেনা সূত্ৰই।
পাক-ভাৰত সীমান্তৰ এই পাকিস্তানী সেনাৰ মোতায়েনৰ ওপৰত তীক্ষ্ম নজৰ ৰাখিছে ভাৰতীয় সেনা বাহিনীয়ে।
ভাৰতৰ ১৫ নং ক’ৰ কামাণ্ডাৰ লেফ্টেনেন্ট জেনেৰেল পি ৰাজুৱে পাকিস্তানে কোনো আক্ৰমণ কৰিলে তাৰ যথোচিত প্ৰত্যুত্তৰ দিয়া হ’ব জানিবলৈ দিছে।
“লাডাখৰ পৰিস্থিতিৰ কোনো প্ৰভাৱ এতিয়াও কাশ্মীৰত পৰা নাই। ১৪ নং ক’ৰ-এ তাত পৰিস্থিতি চম্ভালিছে। কাশ্মীৰ হৈ ভাৰতৰ অতিৰিক্ত সেনা বাহিনীক লাডাখলৈ প্ৰেৰণ কৰা হৈছে। কাৰণ সেইটো হৈছে লাডাখলৈ যোৱা মূল পথ। সেয়ে পাকিস্তানেও সেনা মোতায়েন কৰিছে।” লেঃ জেনেৰেল ৰাজুৱে কয়।
তেওঁ লগতে আৰু কয়, “পাকিস্তানে ভাবিছে ভাৰতে পাকিস্তানক আক্ৰমণ কৰিব পাৰে! হয়তো নিজৰ সুৰক্ষাৰ বাবেই সেনা মোতায়েন কৰিব পাৰে! কিন্তু আমি সতৰ্ক হৈ আছো।”
আনহাতে পাকিস্তানে অস্ত্ৰবিৰতি ভংগৰ সন্দৰ্ভত কৰা এক প্ৰশ্নৰ উত্তৰত কয়, “সন্ত্ৰাসবাদী অনুপ্ৰৱেশৰ যোগেদি পাকিস্তানে সীমান্তত অস্ত্ৰবিৰতি ভংগ কৰি আহিছে। অৱশ্যে বিগত বৰ্ষতকৈও এইবাৰ এনে ঘটনা কম। ইয়াৰ সৈতে লাডাখৰ পৰিস্থিতিৰ সৈতে কোনো সম্পৰ্ক নাই।”
ইফালে জম্মু আৰু কাশ্মীৰৰ কামাণ্ডাৰৰ যৌথ বৈঠকত সেনাই নিয়ন্ত্ৰণ ৰেখাৰ ওচৰত বাংকাৰ নিৰ্মাণত জোৰ দিয়া হৈছে বুলিও তেওঁ কয়।
ইফালে জন্মু-কাশ্মীৰ আৰক্ষীয়ে জনাইছে যে, দক্ষিণ কাশ্মীৰৰ কোকেৰনাগ, ত্ৰাল আৰু খ্ৰুত ২৯ জন বিদেশী সন্ত্ৰাসবাদী সক্ৰিয় হৈ আছে।
