নিজৰ স্বামীয়ে কৰাচীত এৰি দিল্লীত দ্বিতীয়বাৰৰ বাবে বিয়া পাতিবলৈ লোৱাৰ অভিযোগ উত্থাপন কৰিছে এগৰাকী পাকিস্তানী নাগৰিক নিকিতা নাগদেৱে। এই সন্দৰ্ভত ন্যায় বিচাৰি তেওঁ ভাৰতৰ প্ৰধানমন্ত্ৰী নৰেন্দ্ৰ মোদীৰ ওচৰত কাতৰ আহ্বান জনাইছে। মহিলাগৰাকীয়ে ইতিমধ্যে ভাৰতত এক এজাহাৰ দাখিল কৰিছে বুলি জানিব পৰা গৈছে। এটা ভিডিঅ’ৰ জৰিয়তে তেওঁ নিজৰ ক্ষোভ প্ৰকাশ কৰিছে।
নিকিতাৰ দাবী অনুসৰি, ২০২০ চনৰ ২৬ জানুৱাৰীত কৰাচীত পাকিস্তানী মূলৰ বিক্ৰম নাগদেৱৰ সৈতে তেওঁৰ বিবাহ হৈছিল। বিক্ৰম দীৰ্ঘম্যাদী ভিছাৰে ভাৰতৰ ইন্দোৰত বাস কৰে। প্ৰথম অৱস্থাত নিকিতাও স্বামীৰ সৈতে ভাৰততে আছিল। কিন্তু পিছত বিক্ৰমে ভিছাক লৈ হোৱা বিবাদৰ অজুহাতত আত্তাৰী সীমান্তত নিকিতাক এৰি কৰাচীলৈ পঠিয়াই দিয়ে। নিকিতাৰ অভিযোগ, ইয়াৰ পিছত তেওঁৰ স্বামীয়ে তেওঁক ভাৰতলৈ ঘূৰাই অনাৰ কোনো চেষ্টা কৰা নাছিল। আনকি তেওঁ লক্ষ্য কৰিলে যে তেওঁৰ শহুৰেক পক্ষৰ ব্যৱহাৰো সলনি হৈছে।
নিকিতাই কয়, “মই মোৰ স্বামীক বাৰে বাৰে মোক ভাৰতলৈ লৈ আহিবলৈ অনুৰোধ কৰিছিলো। কিন্তু প্ৰতিবাৰেই তেওঁ সেই প্ৰস্তাৱ নাকচ কৰিছিল।” একে সময়তে নিকিতাই অভিযোগ কৰে, “মই গম পালোঁ যে মোৰ স্বামীৰ মোৰ এজন আত্মীয়ৰ লগত প্ৰেমৰ সম্পৰ্ক আছে। মই যেতিয়া শহুৰেকক এই বিষয়ে ক’লোঁ, তেতিয়া তেওঁ ক’লে যে ল’ৰাবোৰ কেৱল প্ৰেমিক। ইয়াৰ বাবে একো কৰিব নালাগে।”
তেওঁৰ মতে, কৰ’না মহামাৰীৰ সময়ত বিক্ৰমে তেওঁক বলপূৰ্বকভাৱে পাকিস্তানলৈ ঘূৰাই পঠিয়াইছিল আৰু তাৰ পিছৰ পৰা তেওঁক ভাৰতলৈ আনিব বিচৰা নাই। আৱেগিক কণ্ঠৰে নিকিতাই কয়, “ভাৰতত প্ৰতিগৰাকী নাৰীৰ ন্যায় পোৱাৰ অধিকাৰ আছে। আজি আমি ন্যায় নাপালে ন্যায়ৰ প্ৰতি নাৰীৰ বিশ্বাস হেৰাই যাব। বহু নাৰীক শহুৰেকৰ ঘৰত শাৰীৰিক আৰু মানসিক অত্যাচাৰৰ বলি হ’বলগীয়া হয়। সকলোকে মোৰ কাষত থিয় দিবলৈ অনুৰোধ জনালোঁ।”
নিকিতাৰ অভিযোগ যে বিক্ৰমে দিল্লীৰ এগৰাকী মহিলাক বিয়া কৰাবলৈ পৰিকল্পনা কৰিছে। তেওঁলোকৰ বিবাহ এতিয়াও বৈধ হৈ থকাৰ বাবে এই কাৰ্য সম্পূৰ্ণ অবৈধ। এই সন্দৰ্ভত তেওঁ ভাৰততো বিক্ৰমৰ বিৰুদ্ধে এজাহাৰ দাখিল কৰিছে। বিক্ৰম আৰু তেওঁৰ ‘দ্বিতীয়া পত্নী’লৈও জাননী প্ৰেৰণ কৰা হৈছে। মধ্যপ্ৰদেশ উচ্চ ন্যায়ালয়ৰ নিৰ্দেশত অধিবক্তা কেন্দ্ৰত শুনানিৰ সময়ত কেন্দ্ৰই জনাইছিল যে যিহেতু স্বামী-স্ত্ৰী দুয়োজনেই পাকিস্তানী নাগৰিক, গতিকে এই সমস্যা পাকিস্তানৰ অধিকাৰক্ষেত্ৰত পৰে। এনে পৰিস্থিতিত বিক্ৰমক পাকিস্তানলৈ পঠিয়াবলৈ পৰামৰ্শ দিয়া হৈছিল যদিও কোনো ব্যৱস্থা লোৱা নহ’ল। সেয়েহে এইবাৰ নিকিতাই ন্যায় বিচাৰি প্ৰধানমন্ত্ৰী মোদীৰ কাষ চাপিছে।
