ভাৰতক উদ্দেশ্য কৰি পাকিস্তানৰ বৈদেশিক মন্ত্ৰী বিলোৱাল ভুট্টো-জৰ্দাৰীয়ে কয় যে ভাৰত চৰকাৰে মহাত্মা গান্ধীৰ মতাদৰ্শত বিশ্বাস নকৰে, বৰঞ্চ বিজেপি চৰকাৰে হত্যাকাৰীৰ মতাদৰ্শত বিশ্বাস কৰে। তেওঁ কয় যে বিজেপি চৰকাৰ হিটলাৰৰ দ্বাৰা প্ৰভাৱিত। বৃহস্পতিবাৰে নিউয়ৰ্কত এখন সংবাদমেলত তেওঁ এই কথা কয়।
পাকিস্তানত সন্ত্ৰাসবাদক ইন্ধন যোগোৱাৰ ক্ষেত্ৰত ভাৰতৰ ভূমিকাক গৰিহণা দি বিলৱালে কয় যে পাকিস্তানত সন্ত্ৰাসবাদী কাৰ্যকলাপে চুবুৰীয়া দেশৰ পৰা সমৰ্থন লাভ কৰিছে। পাকিস্তানৰ বৈদেশিক মন্ত্ৰীয়ে দাবী কৰে যে লাহোৰত সংঘটিত যোহৰ টাউন বিস্ফোৰণত জড়িত আছে ভাৰত।
বিলোৱালে লগতে কয় যে পাকিস্তানত সন্ত্ৰাসবাদ দেশৰ বাহিৰত পৃষ্ঠপোষকতা কৰা হয়। তেওঁ সীমান্তৰ বাহিৰৰ পৰা অহা সন্ত্ৰাসবাদী সংগঠনৰ প্ৰশিক্ষণ আৰু আৰ্থিক সহায় বন্ধ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
পাকিস্তানৰ বৈদেশিক মন্ত্ৰীয়ে লগতে কয় যে সন্ত্ৰাসবাদৰ বিৰুদ্ধে যুদ্ধত পাকিস্তানে লাভ কৰা সফলতাক লৈ গৌৰৱ অনুভৱ কৰিছে। সন্ত্ৰাসবাদ প্ৰতিহত কৰিবলৈ দেশৰ ৰাষ্ট্ৰীয় কাৰ্য্য পৰিকল্পনাত বলিষ্ঠ পদক্ষেপ গ্ৰহণ কৰিছে। সন্ত্ৰাসবাদৰ বিত্তীয় সাহায্য ৰোধৰ বাবে পাকিস্তানে গ্ৰহণ কৰা পদক্ষেপক স্বীকৃতি দিছে ফাইনেন্সিয়েল একচন টাস্ক ফ’ৰ্চে।
