পাকিস্তানৰ এখন বিশেষ আদালতে দেশখনৰ একনায়কত্ববাদী প্ৰাক্তন ৰাষ্ট্ৰপতি পাৰভেজ মুশ্বাৰফক মৃত্যুদণ্ডৰে দণ্ডিত কৰিছে।
মঙলবাৰে মুশ্বাৰফৰ বিৰুদ্ধে এক ষড়যন্ত্ৰৰ গোচৰত তিনিজনীয়া ন্যায়াধীশৰ এখন বিচাৰপীঠে এই ৰায় প্ৰদান কৰে।
সংবাদ মাধমৰ খবৰ অনুসৰি, ২০০৭চনৰ সেনা অভ্যুত্থানৰ জৰিয়তে পাকিস্তানৰ ক্ষমতা দখল কৰা তথা জৰুৰী অৱস্থা প্ৰৱৰ্তন কৰা সন্দৰ্ভত ২০১৩চনত মুশ্বাৰফৰ বিৰুদ্ধে গোচৰ ৰুজু কৰা হৈছিল।
পূৰ্বে পাকিস্তান সেনাৰ মুৰব্বী হিচাপে থকা প্ৰাক্তন ৰাষ্ট্ৰপতিগৰাকীৰ বিৰুদ্ধে চৰকাৰৰ বিৰুদ্ধে ষড়যন্ত্ৰৰ অভিযোগ অনা হৈছিল।
গোচৰটোৰ শুনানি গ্ৰহণ কৰাৰ পাছত ২০১৪’ৰ শেহৰফালে তেওঁক দোষী সাৱ্যস্ত কৰা হৈছিল। কিন্তু ইয়াৰ ৰায়ৰ বিৰুদ্ধে আবেদন তথা আন আইনী জটিলতাৰ বাবে শাস্তি ঘোষণাৰ দিন পিছুৱাই গৈছিল।
ইয়াৰ মাজতে ২০১৬’ত মুশ্বাৰফে দেশ ত্যাগ কৰে। বৰ্তমান প্ৰাক্তন ৰাষ্ট্ৰপতিগৰাকী ডুবাইত চিকিৎসাধীন হৈ থকা বুলি খবৰ পোৱা গৈছে।
চৰকাৰ আৰু আদালতৰ মাজত চলি থকা অৰিয়াঅৰিৰ পাছত অৱশেষত এই মাহৰ ৫তাৰিখে বিশেষ আদালতে ১৭ ডিচেম্বৰত শাস্তিৰ ৰায় প্ৰদান কৰাৰ কথা ঘোষণা কৰিছিল।