ৰিপাব্লিক টিভিৰ মুখ্য সম্পাদক অৰ্ণৱ গোস্বামীৰ হোৱাটছ এপ বিতৰ্কই এতিয়া যে কেৱল দেশতে জোকাৰণিৰ সৃষ্টি কৰিছে তেনে নহয়।
অৰ্ণৱৰ এই বিতৰ্কই এতিয়া চুই গৈছে ইছলামাবাদকো। সেই বাবেই অৰ্ণৱ গোস্বামীৰ কান্ধত থৈ ভাৰতৰ প্ৰধানমন্ত্ৰী নৰেন্দ্ৰ মোদীলৈ বন্দুক টোৱাইছে পাকিস্তানৰ প্ৰধানমন্ত্ৰী ইমৰাণ খানে।
অৰ্ণৱ গোস্বামী আৰু বিএআৰচিৰ প্ৰাক্তন কাৰ্যবাহী বিষয়া পাৰ্থ দাসগুপ্তৰ হোৱাটছ এপ চাটিঙৰ আঁত ধৰি আজি পাক প্ৰধানমন্ত্ৰী ইমৰাণ খানে টুইটাৰত এইবুলি কয় যে বিজেপিয়ে ২০১৯ চনৰ লোকসভা নিৰ্বাচনত বিজয়ী হোৱাৰ লক্ষ্যৰেই বালাকোটত ছাৰ্জিকেল ষ্ট্ৰাইক চলাইছিল ।
In 2019, I spoke at UNGA on how India’s fascist Modi govt used the Balakot crisis for domestic electoral gains. Latest revelations from communication of an Indian journalist, known for his warmongering, reveal the unholy nexus between the Modi govt & Indian media
— Imran Khan (@ImranKhanPTI) January 18, 2021
এই কথা ভাৰতীয় সাংবাদিকগৰাকীৰ হোৱাটছ এপ চাটৰ পৰাই স্পষ্ট হোৱা বুলি ইমৰাণ খানে মন্তব্য কৰে।
টুইটাৰত ইমৰাণ খানে এইবুলি লিখিছে—‘২০১৯ চনত ৰাষ্ট্ৰসংঘৰ সাধাৰণ পৰিষদৰ বৈঠকত মই কৈছিলো যে ফেচীবাদী মোদীৰ চৰকাৰে বালাকোট সংকটক ব্যৱহাৰ কৰি আভ্যন্তৰীণ নিৰ্বাচনত সুবিধা আদায় কৰিছিল।শেহতীয়াকৈ নিজৰ ভুল কৰ্মৰ বাবে পৰিচিত এজন ভাৰতীয় সাংবাদিকৰ কথাত মোদীৰ চৰকাৰ আৰু ভাৰতীয় মিডিয়াৰ ষড়যন্ত্ৰৰ কথা পোহৰলৈ আহিছে।পাকিস্তানত সন্ত্ৰাসবাদী কাম-কাজত উদগনি যোৱা হৈছে। ভাৰত অধিকৃত জম্মু-কাশ্মীৰত ক্ষমতাৰ অপব্যৱহাৰ হৈছে।১৫ বছৰ ধৰি বিশ্বত আমাক বদনামী কৰাৰ ষড়যন্ত্ৰ ৰচনা কৰা হৈছে।এয়া এতিয়া পানীৰ দৰে পৰিস্কাৰ হৈ পৰিছে’।
ইমৰাণ খানৰ এই টুইটৰ পিছতে মোদীৰ চৰকাৰত হাহাকাৰ লাগিছে।
কিয়নো বিজেপিয়ে দেশবাসীৰ সহানুভূতি আদায় কৰি নিৰ্বাচনত জয়ী হোৱাৰ বাবেই বালাকোটৰ আক্ৰমণ সংঘটিত কৰিছিল বুলি আজি কংগ্ৰেছেও অভিযোগ কৰিছে।
কংগ্ৰেছে অৰ্ণৱ গোস্বামীৰ হোৱাটছ এপ চাট বিতৰ্কৰ তদন্ত কৰিবলৈ যুটীয়া সংসদীয় সমিতি গঠনৰো দাবী জনাইছে।
ইয়াৰ মাজতে ইমৰাণ খানেও উত্থাপন কৰা একে অভিযোগে এতিয়া শলঠেকত পেলাইছে মোদীৰ চৰকাৰক।