পাকিস্তানৰ বেটছমেন উমৰ আকমলক অহা তিনিবছৰৰ বাবে নিষিদ্ধ কৰিছে পাকিস্তান ক্ৰিকেট ব’ৰ্ডে। ক্ৰিকেটাৰগৰাকীয়ে মেচ ফিক্সিঙৰ বাবে আগবঢ়োৱাৰ প্ৰস্তাৱ ব’ৰ্ডক নজনোৱাৰ বাবেই ব’ৰ্ডে এই সিদ্ধান্ত গ্ৰহণ কৰে।
সোমবাৰে ব’ৰ্ডৰ অনুশাসনমূলক কমিটিয়ে ক্ৰিকেটাৰগৰাকীৰ বিৰুদ্ধে লোৱা এই কঠোৰ শাস্তিৰ কথা ঘোষণা কৰে। ২০ ফেব্ৰুৱাৰিৰ পৰা এই নিষেধাজ্ঞা বলৱৎ কৰা হৈছে।
উল্লেখ্য যে ব’ৰ্ডৰ দুৰ্নীতি নিবাৰক আচৰণবিধি মতে, কোনো ক্ৰিকেটাৰে যদি মেচ ফিক্সিঙৰ প্ৰস্তাৱ লাভ কৰে তেন্তে সেই বিষয়ে ব’ৰ্ডক অৱগত কৰিব লাগে।
পাকিস্তানৰ অন্যতম প্ৰতিভাৱান বেটছমেন হিচাপে পৰিচিত হৈছিল যদিও তেওঁৰ কৰ্ম কাণ্ডই তেওঁৰ কেৰিয়াৰত বাধা হিচাপে পৰিচিত হয়। তেওঁ কেইবাবাৰো জৰিমনাৰ লগতে নিষেধাজ্ঞাৰ সন্মুখীন হৈছিল।
২০০৯ চনত টেষ্ট ক্ৰিকেটত অভিষেক ঘটা আকমলে এবাৰ ট্ৰেফিক আৰক্ষীৰ সৈতে সংঘাতত লিপ্ত হৈ গ্ৰেপ্তাৰো হৈছিল।
২৯ বছৰীয়া উমৰ আকমলে এই পৰ্যন্ত পাকিস্তানৰ হৈ ১৬ খন টেষ্টত ১০০৩ ৰান, ১২১ খন এদিনীয়াত ৩১৯৪ ৰান আৰু ৮৪ খন টি-২০ আন্তঃৰাষ্ট্ৰীয় মেচত অংশ লৈ ১৬৯০ ৰান সংগ্ৰহ কৰিছিল।