পঞ্চায়ত নিৰ্বাচন : চামগুৰিত কংগ্ৰেছী কৰ্মীক বিজেপি কৰ্মীৰ শিলগুটি নিক্ষেপেৰে আক্ৰমণ
পঞ্চায়ত নিৰ্বাচনৰ দিন চমু চাপি অহাৰ লগে লগে বিভিন্ন ৰাজনৈতিক দলৰ মাজত সংঘাত সৃষ্টি হোৱাৰ সময়তে নগাঁও জিলাৰ চামগুৰি সমষ্টিত পুনৰ সংঘটিত হিংসাত্মক ঘটনাই অঞ্চলটোৰ ৰাইজম মাজত চাঞ্চল্যৰ সৃষ্টি কৰিছে।
প্ৰাপ্ত তথ্য মতে নগাঁও জিলাৰ চামগুৰি সমষ্টিৰ অধীনৰ বাজিয়াগাঁও উন্নয়ন খণ্ডৰ অন্তৰ্গত কনুৱামাৰী গাঁও পঞ্চায়তত পুনৰ কালি নিশা কংগ্ৰেছ আৰু বিজেপিৰ মাজত সংঘাত সৃষ্টি হয়।
দেওবাৰ অৰ্থাৎ ২৫ নৱেম্বৰৰ নিশা কনুৱামাৰী গাঁও পঞ্চায়তৰ কংগ্ৰেছ দলৰ সভাপতি পদৰ প্ৰাৰ্থী ফৰিদা বেগমে কেইজনমান দলীয়া কৰ্মীক লগত লৈ কনুৱামাৰীৰ পৰা সোণাৰিবালি দিশে এ এছ ০২ জে ২০২০ নম্বৰৰ ইণ্ডিকা গাড়ীৰে আহি আছিল।
তেনে অৱস্থাতে আন্ধাৰৰ সুযোগ লৈ বিজেপি কৰ্মীয়ে শিলগুটি নিক্ষেপ কৰাত গাড়ীখনৰ গ্লাচ ভাঙি বিস্তৰ ক্ষতি সাধন হোৱাৰ লগতে গাড়ীত থকা কংগ্ৰেছ কৰ্মী কেইজনো কথমপি ৰক্ষা পৰে।
আনহাতে বিজেপি কৰ্মীয়ে এনেদৰে শিলগুটি নিক্ষেপেৰে আক্ৰমণ কৰাত কংগ্ৰেছী কৰ্মী কেইজনেও হাতে হাতে লাঠি লৈ বিজেপি কৰ্মী কেইজনক আক্ৰমণ কৰাৰ লক্ষ্যৰে খেদি যায়।
ইফালে বিজেপি কৰ্মীয়েও হাতে হাতে লাঠী লৈ কংগ্ৰেছীকৰ্মী কেইজনক আক্ৰমণৰ লক্ষ্যৰে খেদি যায় যদিও সেই সময়তে উক্ত স্থানত চামগুৰি আৰক্ষীৰ এটা বৃহৎ দল উপস্থিত হৈ পৰিস্তিতি নিয়ন্ত্ৰণ কৰিবলৈ সক্ষম হয়।
ইতিমধ্যে এই ঘটনাৰ সন্দৰ্ভত কংগ্ৰেছৰ ফালৰ পৰা চামগুৰি থনাত এজাহাৰ দাখিল কৰে বুলি জানিব পৰা গৈছে।