সমাগত পঞ্চায়ত নিৰ্বাচন ৰাজ্যখনৰ ৰাজনৈতিক দলবোৰৰ শক্তি পৰীক্ষাৰ এক উপযুক্ত সুযোগ হিচাপে পৰিগণিত হৈছে। অসমৰ প্ৰধান ৰাজনৈতিক দল হিচাপে বিজেপি,কংগ্ৰেছ আৰু অসম গণ পৰিষদৰ ওপৰত ৰাজ্যখনৰ জনসাধাৰণৰ দৃষ্টি নিবদ্ধ হৈছে।স্থান সাপেক্ষে এআইয়ুডিএফৰ প্ৰতিও লক্ষ্য ৰাখিব ৰাইজে। কিন্তু সাম্প্ৰতিক পৰিস্থতিত সকলোবোৰ ৰাজনৈতিক দলৰ ওপৰতে ৰাইজৰ ভৰসা হ্ৰাস পোৱালৈ চাই পঞ্চায়ত নিৰ্বাচনৰ ফলাফলে অন্য এক সম্ভাৱনাৰ দুৱাৰ মুকলি কৰাৰো থল আছে।
আপাতত: ৰাজ্যখনত চৰকাৰৰ নেতৃত্ব বহন কৰা বিজেপি দলে পঞ্চায়তৰ ফলাফলত ভাল ফল দেখুৱাব বুলি দম্ভ মাৰিলেও ভিতৰি ভিতৰি শংকিত হৈ আছে। কিয়নো ৰাজ্যখনৰ শেহতীয়া পৰিস্থতিত দলটোৱে অসমৰ থলুৱা-খিলঞ্জীয়া জনসাধাৰণৰ আস্থা ধৰি ৰখাত ব্যৰ্থ হোৱাৰ অভিযোগ উত্থাপিত হৈছে। বিশেষকৈ নাগৰিকত্ব সংশোধনী বিধেয়ক ২০১৬’ প্ৰসংগত বিজেপিয়ে গ্ৰহণ কৰা স্থিতিত অসমৰ ৰাইজ সন্তুষ্ট নহয়। তদুপৰি উন্নয়নৰ দিশতো চৰকাৰখনে সফলতাৰ দাবী কৰিব পৰাকৈ বিশেষ একো কৰা নাই। কেবল আঁচনিৰ নাম সলনি কৰিয়েই কৃতিত্ব অৰ্জাৰ প্ৰচেষ্টাই জনসাধাৰণক বিতুষ্ট কৰি তোলাহে দেখা গৈছে।
আনহাতে, কংগ্ৰেছৰ প্ৰতি ঘটা ৰাইজৰ মোহভংগ এতিয়াও আঁতৰা নাই।দলটোৱে জনসাধাৰণৰ মাজলৈ যাব পৰাকৈ কোনো বিষয়তে পতিয়নযোগ্য নীতি অৱলম্বন কৰা নাই।তদুপৰি কংগ্ৰেছৰ বৰ্তমানৰ ৰাজ্যিক নেতৃত্ব ৰাজ্যখনৰ জনসাধাৰণৰটো দূৰৰে কথা, দলটোৰ ভিতৰতে কৰ্মীসকলৰ আস্থা ধৰি ৰখাত ব্যৰ্থ হৈছে।প্ৰাক্তন মুখ্য মন্ত্ৰী তৰুণ গগৈক বাদ দি প্ৰদেশ কংগ্ৰেছৰ নেতাসকল তেনেই নিষ্প্ৰভ। গগৈয়েহে যেন এতিয়াও দলটোক ধৰি ৰাখিছে এনে লাগে। দলটোৰ ৰাজ্যিক সভাপতিগৰাকীয়ে বিভিন্ন সময়ত কৰা ৰাজনৈতিক মন্তব্যসমূহে দলটোক তুলি ধৰাৰ সলনি ক্ষতিহে কৰা দেখা গৈছে।গতিকেই এনে নেতৃত্বৰে কংগ্ৰেছে পঞ্চায়তত ভাল ফল লাভ কৰাৰ আশা বৃথা। একমাত্ৰ ধৰ্মীয় সংখ্যালঘু প্ৰধান অঞ্চলত দলটোৱে কিছু ভাল ফল প্ৰদৰ্শন কৰিব পাৰে।
কংগ্ৰেছৰ দৰে এআইয়ুডিএফেও ধৰ্মীয় সংখ্যালঘুৰ ভোটৰ ওপৰতে নিৰ্ভৰ কৰিছে।দলটোৰ নেতা বদৰুদ্দিন আজমলৰ বিৰুদ্ধে বহুসময়ত ধৰ্মীয় সংখ্যালঘু সম্প্ৰদায়ৰ নেতাসকলে বিৰূপ মন্তব্য কৰি আহিলেও নিৰ্বাচনকেন্দ্ৰিক ৰাজনীতিত আজমলক উপেক্ষা কৰিব পৰা নাই।পূৰ্বৰ নিৰ্বাচনী ফলাফলসমূহে সেই কথা ইতিমধ্যে প্ৰমাণ কৰিছে।সেয়েহে পঞ্চায়ত নিৰ্বাচনতো এআইয়ুডিএফে ধৰ্মীয় সংখ্যালঘু অঞ্চলত কংগ্ৰেছৰ দৰে সমানে প্ৰভাৱ পেলোৱাৰ সম্ভাৱনা আছে।
আগন্তুক পঞ্চায়ত নিৰ্বাচনত এইবাৰ সকলোৰে দৃষ্টি নিবদ্ধ হৈছে ৰাজ্যখনৰ একমাত্ৰ আঞ্চলিক দল অসম গণ পৰিষদৰ ওপৰত।বৰ্তমান জনসাধাৰণৰ মনত ৰাষ্ট্ৰীয়তাবাদ আৰু আঞ্চলিকতাবাদৰ মাজত কোনটোক আদৰি ল’ব তাক লৈ এটা দ্বন্দ্বৰ সৃষ্টি হৈছে। ৰাষ্ট্ৰীয় ৰাজনৈতিক দল বিলাকে আঞ্চলিক শক্তিৰ উত্থান কেতিয়াও সহ্য নকৰে। সেয়েহে আঞ্চলিক দলবিলাক শক্তিহীন কৰি তুলি ধ্বংস কৰাটোৱে এওঁলোকৰ প্ৰধান লক্ষ্য। অৱশ্যে বিজেপিয়ে অসমত আঞ্চলিকতাবাদী অগপৰ বোকোচাত উঠিয়েই আজি শাসনৰ বাঘজৰী নিজৰ হাতলৈ আনিলে। কিন্তু দুৰ্ভাগ্যজনকভাৱে বিজেপিৰ একাংশ নেতাই সেইকথা অস্বীকাৰ কৰাই নহয় অগপক এতিয়া বাটৰ কাঁইট হিচাপে গণ্য কৰি দলিয়াই দিব বিচাৰিছে।
লক্ষণীয় কথাটো হ’ল বৰ্তমান অসমত বিজেপি আৰু অগপ দুয়োটা দলতে নেতাসকলৰ দুটা সমান্তৰাল ধাৰা স্পষ্ট হৈ উঠিছে। বিজেপিত থকা জাতীয়তাবাদী ধাৰাটোৱে অগপৰ সৈতে মিত্ৰতাৰ প্ৰসংগত আগবাঢ়ি যাব খোজে যদিও আনটো ধাৰাত থকা দল বাগৰা নেতা আৰু প্ৰতিযোগিতাহীন সময়ছোৱাৰ বিজেপি নেতৃত্ব বহন কৰা নেতা একাংশই অগপক অঁতৰাই পঠিওৱাৰ অভিসন্ধিত ব্যস্ত।
আনহাতে, দল-বাগৰা তথা কংগ্ৰেছী সংস্কৃতিৰে পুষ্ট একাংশ নেতাই বিজেপিত যোগ দি ইতিমধ্যেই ক্ষমতাৰ নতুন সমীকৰণ বিচাৰি শীতল যুদ্ধৰ আখৰা আৰম্ভ কৰিছে। এইক্ষেত্ৰত পূৰ্বতে কংগ্ৰেছত থাকোতে অগপৰ কাৰ্যালয়টো বিবাহ ভৱন হ’ব বুলি ভৱিষ্যৎবাণী কৰা নেতাজনেই এতিয়া বিজেপিলৈ আহি অগপক “বাই বাই’’ দিবলৈ তৎপৰ হৈ পৰিছে। ইপিনে অগপৰ নেতৃত্বও মিত্ৰতাক লৈ দুটা ভাগত বিভক্ত হৈছে। দলটোৰ বৰ্তমানৰ নেতৃত্ব বহন কৰা তথা ক্ষমতাসীন সকলে এতিয়া মিত্ৰতা ভংগও কৰিবও বিচৰা নাই আৰু মিত্ৰতা ধৰি ৰাখিবলৈ গৈ বাৰে বাৰে উজুটি খাবলগীয়া হৈছে।
যি কি নহওক, ভিতৰি যিয়েই নাথাকক পঞ্চায়ত নিৰ্বাচনত দুয়োটা দলেই সুকীয়াকৈ নিৰ্বাচনত অৱতীৰ্ণ হৈছে। এতিয়া পঞ্চায়ত নিৰ্বাচনৰ ফলাফলে দুয়োটা দলৰে “ভেটি’’ কিমান অক্ষত আছে তাৰ প্ৰমাণ দাঙি ধৰিব। অগপ বিহীন বিজেপিয়ে ৰাজ্যখনৰ জনসাধাৰণ কিমান আস্থা অৰ্জন কৰিব পাৰিছে তাৰ প্ৰকৃত ছবিখন দাঙি ধৰাৰ লগতে অগপইয়ো আপোচ সূত্ৰত বান্ধ খাই পৰাৰ পাছত নিজৰ ভেটি কিমান অক্ষুণ্ণ ৰাখিব পাৰিছে তাৰ ছবি স্পষ্ট হ’ব।
বিজেপি নেতাৰ ককৰ্থনা লাভ কৰাৰ পাছতো যদি অগপই পঞ্চায়তত ভাল ফলাফল প্ৰদৰ্শন কৰিব পাৰে তেন্তে আঞ্চলিকতাবাদক বাদ দি বিজেপিয়ে নিৰ্বাচনী বৈতৰণী পাৰ হোৱাৰ স্বপ্ন পৰিহাৰ কৰিবলৈ বাধ্য হ’ব আৰু তেতিয়াই অগপই নিজৰ অস্তিত্ব প্ৰতিপন্ন কৰাৰ সুযোগ পাব। সেয়েহে, আগন্তুক পঞ্চায়ত নিৰ্বাচন অগপৰ বাবে হৈ পৰিছে এক অগ্নিপৰীক্ষা।
