আফগানিস্তানত তালিবানে ১০০ শতাংশ অঞ্চল দখল কৰা বুলি কৰি অহা দাবী ওফৰাই পঞ্জশিৰ অঞ্চলত সমান্তৰাল চৰকাৰ গঠনৰ কথা ঘোষণা কৰিলে তালিবান বিৰোধী নৰ্দান এলায়েন্সে।
নৰ্দান এলায়েন্সৰ নেতা মাচুদ আহমেদে কয় যে তালিবানে পঞ্জশিৰ দখল কৰা বুলি দাবী কৰি আহিছে যদিও সেই দাবীৰ কোনো ভিত্তি নাই।
পঞ্জশিৰত তালিবান প্ৰত্যাহ্বানৰ সন্মুখীন হৈছে। সেই অঞ্চলত তালিবানৰ সৈতে নৰ্দান এলায়েন্সৰ তীব্ৰ যুঁজ চলি আছে।
পঞ্জশিৰ শীঘ্ৰে সমান্তৰাল চৰকাৰ গঠন কৰা হ’ব বুলিও আহমেদে প্ৰকাশ কৰে। তেওঁ কয় যে তালিবানে যি অন্তৰ্ৱতীকালীন চৰকাৰ গঠন কৰিছে সেই চৰকাৰ সম্পূৰ্ণ ৰূপে অবৈধ চৰকাৰ।
তালিবানে সাধাৰণ আফগান জনতাৰ ইচ্ছাৰ বিৰুদ্ধে গৈ চৰকাৰে গঠন কৰিছে।
নৰ্দান এলায়েন্সে তালিবানৰ চৰকাৰে কোনো পধ্যে মানি নলয় বুলিও আহমেদে প্ৰকাশ কৰে।তালিবানে গণতন্ত্ৰ নামানে বুলি উল্লেখ কৰি আহমেদে কয় যে সেইবাবেই তালিবানে চৰকাৰত বহু কেইজন সন্ত্ৰাসবাদী নেতাক স্থান দিছে।
তালিবানে নৰীক সুৰক্ষা দিয়াৰ সলনি নাৰীৰ ওপৰত অত্যাচাৰহে চলাইছে বুলি তেওঁ কয়।
ইপিনে নৰ্দান এলায়েন্সৰ নেতা মাচুদ আহমেদে তালিবানৰ ভয়ত তাজিকস্তানলৈ পলায়ন কৰা বুলি তালিবানে যি প্ৰচাৰ চলাই আহিছে সেয়াও নস্যাৎ কৰিছে আহমেদে।
তেওঁ কয় যে তালিবানৰ ভয়ত তেওঁ পলায়ন কৰা নাছিল আৰু নকৰেও।
উল্লেখ্য আফগানিস্তানৰ উত্তৰ অংশত মাচুদ আহমেদৰ বেছ জনপ্ৰিয়তা আছে।
সেয়ে সমান্তৰাল চৰকাৰ গঠন হ’লে স্বাভাৱিকতে শলঠেকত পৰিব তালিবানে গঠন কৰা নতুন চৰকাৰ খন।
