ৰিলছ বনোৱা একাংশ মহিলাক উদ্দেশ্যি আচাৰ্য্য পংকজ পাঠকে তেওঁলোকৰ স্বামীসকলক বান্দৰ কেকোৱা নামৰ তেওঁ প্ৰস্তুত কৰা বনৌষধ ক্ৰয় কৰি খুৱাবলৈ পৰামৰ্শ দিছিল। তাৰ পাছতে যেন নিজৰ গাতে বান্দৰ কেকোৱা লগাৰ দৰে অৱস্থা হৈছিল পংকজ পাঠকৰ। ৰাজ্যৰ থানাই থানাই পংকজ পাঠকৰ বিৰুদ্ধে গোচৰ দাখিল হ’বলৈ ধৰিছিল।
অৱশেষত যোৱা ২০ জুলাইৰ নিশা হাউলীৰ কালঝাৰৰ পৰা বৰপেটা আৰক্ষীয়ে গ্ৰেপ্তাৰ কৰিছিল পংকজ পাঠকক।
অৱশ্যে, ২৪ ঘন্টা সম্পূৰ্ণ নোহোৱাকৈ আৰক্ষীৰ জিম্মাৰ পৰাই জামিন লাভ কৰি মুকলি আকাশৰ তললৈ আহিছিল পংকজ পাঠক।
অৱশ্যে, মহিলাক উদ্দেশ্যি তেনে মন্তব্য দিয়াৰ পাছত এতিয়া কিছু পৰিমাণে অনুতপ্ত আচাৰ্য্যগৰাকী।এক ফেচবুক পোষ্টযোগে পাঠকে সকলোকে ধন্যবাদ জনাই কয় “আপোনালোকে অন্যায়ৰ বিৰুদ্ধে সকলোৱে একগোট হৈ মোৰ পক্ষত Social media ত যিধৰণে লাগিলে , সেই ঋণ হয়তো মই এই জীৱনত পৰিশোধ কৰিব নোৱাৰিম । হয় মই মোৰ কিছুমান কমেণ্টৰ দ্বাৰা মাজে মাজে দুই এজনৰ মনত দুখ দিছোঁ । কিন্তু আজি মই সেইসকল ব্যক্তিকো মাফ খুজিছোঁ , যিসকল ব্যক্তি মোৰ কমেণ্টৰ দ্বাৰা মনত আঘাত পাইছিল “।
পাঠকে লগতে লিখি কয় “এটা কণ্টকময় পাৰিবাৰিক জীৱন , ছমাহৰ ভিতৰত মাতৃ আৰু ভাতৃ দুয়োজনকে হেৰুৱাই মই মানসিক ভাৱে কিছু ভাৰাক্ৰান্ত হৈ হয়তো বহুতৰে মনত আঘাত দিছোঁ । এই চেগতে তেওঁলোককো মই মাফ খুজিছোঁ” ।
ইপিনে, সংগদোষত পৰাৰ বাবেহে বহু সময়ত এটা বিশেষ ধৰ্ম বা সম্প্ৰদায়ক লৈ পাঠকে গালি গালাজ পাৰি আহিছিল বুলি তেওঁ উল্লেখ কৰে।
তেওঁ কয় “এটা সময়ত মই হয়তো কিছু সংগ দোষত পৰি নাইবা কাৰোবাৰ প্ৰৰোচনাত পৰিয়েই হওঁক , এটা বিশেষ ধৰ্মৰ মানুহৰ ওপৰত অজানিতে মই কিছুমান মন্তব্য দিছিলোঁ । যাৰ বাবে মই তেওঁলোকৰ মাজত সমালোচিত হৈছিলোঁ । কিন্তু মোৰ এই বেয়া দিনৰ সময়ত তেওঁলোকেও মোৰ হৈ যুদ্ধ কৰি মোক এইটো প্ৰমাণ কৰি দিছে যে আমি সকলো অসমীয়া আৰু আমি সকলো ভাই-ককাই । এই চেগতে মই তেওঁলোককো মাফ খুজিব বিচাৰিছোঁ । তেওঁলোকে যেন মোক নিজৰ ভাতৃ জ্ঞান কৰি মাফ কৰি দিয়ে” ।
সকলোৱে বিচৰা ধৰণে আজিৰ পৰাই পংকজ পাঠকে সামাজিক মাধ্যমত কোনো ধৰণৰ ব্যক্তিগত মন্তব্য দিয়াৰ পৰা বিৰত থাকিব বুলি উল্লেখ কৰে ।
কেৱল স্বাস্থ্য সম্পৰ্কীয় বিধান দিয়াৰ বাবে ফেচবুকৰ ব্যৱহাৰ কৰিব বুলিও তেওঁ জনায় ।শেষত তেওঁ লিখি কয় “যিহেতু আপোনালোকে মোক মোৰ বিপদৰ সময়ত অকলে এৰি নিদিলে , সেয়েহে মইও আপোনালোকৰ মাজত চিৰদিন এনেকৈয়ে থাকিম” ।
