অৰুণাচল পেৰাগ্লাইডিং এছোচিয়েশ্যনৰ উদ্যোগত পেৰাগ্লাইডিং মহোৎসৱৰ আয়োজন
অৰুণাচল পেৰাগ্লাইডিং এছোচিয়েশ্যনৰ উদ্যোগত অৰুণাচলত প্ৰথমবাৰৰ বাবে পেৰাগ্লাইডিং মহোৎসৱৰ আয়োজন কৰিবলৈ লোৱা হৈছে। নৱেম্বৰৰ ১৭ তাৰিখৰ পৰা ১৯ তাৰিখলৈ এই পেৰাগ্লাইডিং মহোৎসৱ চলিব। ঘাইকৈ পৰ্যটন খণ্ডটোক উদগণি দিয়াৰ বাবে আয়োজন কৰা এই ৰোমাঞ্চকৰ তথা দুঃসাহসী ক্ৰীড়াত যোগদান কৰাৰ বাবে ভাৰতকে ধৰি বিশ্বৰ বিভিন্ন স্থানৰ পেৰাগ্লাইডিং পাইলটসকলক আহ্বান জনোৱা হৈছে। অৰুণাচলৰ ‘পাপ্পু ভেলী’ত ক্ৰছ কাণ্ট্ৰী এক্সপ্ল’ৰেশ্যনৰ আয়োজন কৰা হৈছে। এই প্ৰতিযোগিতাৰ মুঠ প্ৰাইজমানি হৈছে ১৫০,০০০ টকা।
পেৰাগ্লাইডিঙত যোগদান কৰাৰ বাবে আয়োজকসকলে কেতবোৰ নিয়ম ধাৰ্য কৰি দিছে। তাৰ ভিতৰত হৈছে (১)পেৰাগ্লাইডাৰসকলে চাৰ্টিফাইড পেৰাগ্লাইডিং গীয়েৰ (পেৰাগ্লাইডিং উইং, হাৰ্নেছ, হেমলেট, ৰিজাৰ্ভ আদি আদিব লাগিব, (২) উৰণ অভিজ্ঞতা (বেছিক থাৰ্মেলিং এক্সপেৰিয়েন্সক অগ্ৰাধিকাৰ দিয়া হ’ব), (৩) পেৰাগ্লাইডিঙৰ ৰিস্ক সামৰি লোৱা বৈধ বীমা পলিচি (৪) এটা ইতিবাচক চিন্তাধাৰা।
যোগদানৰ ভৰ্তি মাচুল হৈছে ৫০০০ টকা (৮০ আমেৰিকান ডলাৰ। এই ভৰ্তি মাচুলৰ লগতে অংশগ্ৰহণকাৰীগৰাকীৰ থকা-খোৱাৰ লগতে পেৰাগ্লাইডিংৰ স্থানলৈ পৰিবহণৰ ব্যয়ো অন্তৰ্ভুক্ত আছে। পঞ্জীয়ন মাচুল জমা দিয়াৰ পাছতহে প্ৰতিযোগীসকলৰ অংশগ্ৰহণ সুনিশ্চিত কৰা হ’ব। অংশগ্ৰহণকাৰীসকলৰ পঞ্জীয়ন গ্ৰহণ কৰাৰ অধিকাৰ অৰুণাচল পেৰাগ্লাইডিং এছোচিয়েশ্যনৰ ওপৰত ন্যস্ত থাকিব।
এই পেৰাগ্লাইডিং মহোৎসৱত অংশগ্ৰহণকাৰীৰ সংখ্যা ৩০ গৰাকীত সীমাবদ্ধ কৰা হৈছে আৰু প্ৰথমে পঞ্জীয়ন কৰা সকলক অগ্ৰাধিকাৰ প্ৰদান কৰা হ’ব।