ৰাজ্যৰ বিভিন্ন প্ৰান্তৰ লগতে কলিয়াবৰতো বছৰ বছৰ ধৰি চলি থকা তীৰৰ অবাধ ব্যৱসায়ৰ লগত জড়িত এজন লোকক জখলাবন্ধা আৰক্ষীয়ে শুকুৰবাৰে গ্ৰেপ্তাৰ কৰে।
ৰাজ্যখনত তীৰ, জুৱা খেলে সমাজত ভয়ানক প্ৰভাৱ পেলোৱাৰ মাজতে শুকুৰবাৰে বিয়লি কলিয়াবৰৰ জখলাবন্ধা আৰক্ষীয়ে কলিয়াবৰৰ মহকুমা আৰক্ষী বিষয়া মৃণ্ময় দাসৰ সহযোগত কলিয়াবৰৰ মিৰিভেটিৰ পৰা সুশীল বিশ্বাস নামৰ লোক এজনক গ্ৰেপ্তাৰ কৰে।
কলিয়াবৰ মহকুমা আৰক্ষী বিষয়া মৃণ্ময় দাসে জানিব দিয়া অনুসৰি ধৃত সুশীল বিশ্বাসে তীৰৰ বুকি হিচাপে কাম কৰি আহিছিল। আৰক্ষীয়ে গ্ৰেপ্তাৰ কৰাৰ সময়ত বিশ্বাসৰ পৰা তীৰৰ বুকৰ নথিৰ লগতে কিছু টকাও জব্দ কৰে। অৱশ্যে জব্দ কৰা টকাৰ মুঠ পৰিমাণ বৰ্তমান জানিব পৰা হোৱা নাই।
আনহাতে, জখলাবন্ধা আৰক্ষীয়ে গ্ৰেপ্তাৰ কৰা সুশীল বিশ্বাসৰ বিৰুদ্ধে ১৩৭/১৮ /১৪ ধাৰাত গোচৰ ৰুজু কৰি কলিয়াবৰ ন্যায়িক আদালতলৈ প্ৰেৰণ কৰে।
সুশীল বিশ্বাস জালত পৰাৰ লগে লগে এই চক্ৰৰ লগত জড়িত আৰু বহুতো লোক জালত পৰাৰ আশা ব্যক্ত কৰিছে জখলাবন্ধা আৰক্ষীয়ে।