দেশৰ বিভিন্ন ৰাজ্যত হিন্দী ভাষাৰ প্ৰয়োগকলৈ প্ৰতিক্ৰিয়া অব্যাহত আছে। বহুতে সকলো ৰাজ্যতে হিন্দী ভাষা জাপি দিব বিচাৰিছে। এনে সময়তে ভাৰতৰ চৰকাৰী কামকাজত হিন্দী ভাষা ব্যৱহাৰ কৰিবলৈ চৰকাৰী ভাষা সংক্ৰান্তীয় সংসদীয় কমিটিয়ে কেন্দ্ৰীয় গৃহ মন্ত্ৰালয়ক পৰামৰ্শ দিছে। এই কথাই এতিয়া দক্ষিণ ভাৰতৰ ৰাজ্য সমূহৰ লগতে আন বহু ৰাজ্যত প্ৰতিক্ৰিয়াৰ সৃষ্টি কৰিছে।
হিন্দী ভাষাক চৰকাৰী কামত ব্যৱহাৰ কৰিবলৈ পৰামৰ্শ দি প্ৰস্তুত কৰা এখন প্ৰতিবেদন চলিত বৰ্ষৰ ছেপ্টেম্বৰ মাহত ৰাষ্ট্ৰপতিলৈ প্ৰেৰণ কৰা হৈছে বুলি জানিব পৰা গৈছে। হিন্দীত শিক্ষাদান প্ৰসংগত কমিটিয়ে তাত কৈছে যে শ্ৰেণীকক্ষত হিন্দীৰ ব্যৱহাৰ বাঞ্ছনীয়। ইংৰাজীৰ ব্যৱহাৰ ঐচ্চিক হ’ব পাৰে। কেন্দ্ৰীয় বিদ্যালয়, নবোদয় বিদ্যালয়, কেন্দ্ৰীয় বিশ্ববিদ্যালয়, আইআইটি, আইআইম- সকলো ইয়াৰ আওতালৈ অনা উচিত।
চৰকাৰী পৰীক্ষাসমূহতো বাধ্যতামূলক ইংৰাজীৰ পেপাৰৰ সলনি হিন্দী পেপাৰৰ ব্যৱস্থা কৰাৰ অনুৰোধ কৰা হৈছে। কমিটিৰ বক্তব্য অনুসৰি, বাধ্যতামূলক ইংৰাজীৰ পেপাৰৰ দ্বাৰা এনে এটা ধাৰণা তৈয়াৰ কৰা হৈছে যেন ইংৰাজী বেছি গুৰুত্বপূৰ্ণ। কিন্তু এয়া হ’বলৈ নিদিয়াটোৱে কমিটিৰ লক্ষ্য।
তদুপৰি, চৰকাৰী প্ৰতিষ্ঠানৰ কাম-কাজো যাতে হিন্দীতে হয়, সেয়া নিশ্চিত কৰাৰ কথাও কোৱা হৈছে ৰিপ’র্টত। সেই অনুসৰি, চৰকাৰী কৰ্মচাৰী নিৰ্বাচনৰ ক্ষেত্ৰত যাতে হিন্দীৰ জ্ঞান অন্যতম মাপকাঠি হয়, তাৰ প্ৰতিও লক্ষ্য ৰখাৰ কথা কোৱা হৈছে।
