Bundelkhand Expressway Collapse: পাঁচ দিন পূৰ্বে উদ্বোধন কৰিছিল মোডীয়ে; খহি পৰিল ৮,০০০ কোটি টকাৰ বুন্দেলখণ্ড এক্সপ্ৰেছৱেৰ একাংশ
Bundelkhand Expressway Collapse এক বিৰাট আয়োজনেৰে দেশৰ প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিছিল বুন্দেলখণ্ড এক্সপ্ৰেছৱে। যোৱা ১৬ জুলাইত উদ্বোধন কৰা বুন্দেলখণ্ড এক্সপ্ৰেছৱেৰ কিছু অংশ বৃহস্পতিবাৰে খহি পৰে। ইয়াকে লৈ গেৰুৱা শিবিৰ বিৰোধীৰ সমালোচনাৰ সন্মুখীন হৈছে।
দৰাচলতে ইমান টকা খৰচ কৰি নিৰ্মাণ কৰা এক্সপ্ৰেছৱেটো উদ্বোধনৰ পাঁচ দিনৰ ভিতৰত কেনেকৈ খহি পৰিল তাক লৈও প্ৰশ্ন উত্থাপিত হৈছে। এই সেতু নিৰ্মাণত মুঠ ব্যয় হৈছে ৮,০০০ কোটি টকা।
লগতে পঢ়ক: Draupadi Murmu: কেনেকুৱা আছিল দেশৰ ৰাষ্ট্ৰপতি পদ অলংকৃত কৰা দ্ৰৌপদী মুৰ্মুৰ ৰাজনৈতিক কেৰিয়াৰ?
বাতৰি অনুসৰি চালেমপুৰৰ ওচৰৰ ছিৰিয়াৰ বুন্দেলখণ্ড এক্সপ্ৰেছৱেত বৃহৎ গাঁতৰ সৃষ্টি হৈছে। বুধবাৰে নিশা দুখন গাড়ী আৰু এখন মটৰচাইকেল দুৰ্ঘটনাত পতিত হয়। অৰৈয়াৰ অজিতমলৰ ওচৰৰ ৰাস্তাতো গাঁতৰ সৃষ্টি হৈছে।
অৱশ্যে, ৰাস্তাৰ গাঁতবোৰৰ মেৰামতিৰ কাম ইতিমধ্যে আৰম্ভ হৈছে। কিন্তু ইয়ে বিৰোধীৰ সমালোচনা বন্ধ কৰিব পৰা নাই।
উত্তৰ প্ৰদেশৰ চিত্ৰকূটৰ ভাৰতকুপৰ পৰা ইটাৱাৰৰ কুড্ৰেলত উপস্থিত হ’বলৈ ২৯৬ কিলোমিটাৰ দীঘল চাৰিলেনৰ এক্সপ্ৰেছৱে নিৰ্মাণ কৰা হৈছে। উত্তৰ প্ৰদেশৰ সাতখন জিলা আৰু মধ্য প্ৰদেশৰ ছয়খন জিলা বুন্দেলখণ্ডৰ অন্তৰ্গত।
লগতে পঢ়ক: শিৱসাগৰৰ ৯ বছৰীয়া বনকৰা শিশুৰ হত্যাকাণ্ড; আৰক্ষীকো বিপথে পৰিচালিত কৰিছিল অভিযুক্তই
বুন্দেলখণ্ড এক্সপ্ৰেছৱে অঞ্চলটোত বস্ত্ৰ, খাদ্য প্ৰক্ৰিয়াকৰণ, সংৰক্ষণ আৰু দুগ্ধজাত সামগ্ৰীৰ উৎপাদন উদ্যোগৰ প্ৰসাৰৰ বাবে নিৰ্মাণ কৰা হৈছিল। ভূমি ক্ৰয়কে ধৰি এই প্ৰকল্পত ব্যয় হৈছে ৮,০০০ কোটি টকা।