অসমৰ বিৰোধীত থকা ভাঙোন পুনৰবাৰ দেখিবলৈ পোৱা গৈছে। মুখ্যমন্ত্ৰী হিমন্ত বিশ্ব শৰ্মাৰ এটা টুইটতে স্পষ্ট হৈছে এই কথা।
টুইটত মুখ্যমন্ত্ৰীয়ে জনোৱা অনুসৰি ১২৬ গৰাকী বিধায়কৰ ভিতৰত ১০৪ টা ভোট NDA সমৰ্থিত প্ৰাৰ্থী দ্ৰৌপদী মুৰ্মুৱে লাভ কৰিছে।
AIUDF ৰ দুগৰাকী বিধায়ক হজত যোৱা বাবে ভোট দানৰ পৰা বিৰত আছিল।
বাকী ৭৯ টা NDA অৰ্থাৎ বিজেপি মিত্ৰজোঁটৰ আছিল যদিও বাকী অতিৰিক্তভাৱে ২৫ টা ভোট বিৰোধী পক্ষৰ পৰা অহাটো একেবাৰে নিশ্চিত। অৰ্থাৎ ২৫ টা ক্ৰছ ভোটিং অসমৰ পৰা হোৱা বুলি মুখ্যমন্ত্ৰীৰ টুইটত স্পষ্ট।
Smt Droupadi Murmu polled 104 votes compared to NDA’s original strength of 79 in the 126 member Assam Assembly. 2 absent .
My heartfelt gratitude to the people of Assam for reposing their faith in the NDA’s Presidential candidate & wholeheartedly joining this historic moment.
— Himanta Biswa Sarma (@himantabiswa) July 21, 2022
প্ৰশ্ন হৈছে বিৰোধী পক্ষৰ কোন ২৫ গৰাকী বিধায়কে দিলে ক্ৰছ ভোটিং?
অৱশ্যে কিছুদিনৰ পৰা বিপিএফেও বিজেপিৰ সমৰ্থনতে কাম কৰি যোৱা বুলি অনুমান কৰিব পাৰি। তেনেক্ষেত্ৰত দ্ৰৌপদী মুৰ্মুৰ সমৰ্থনতে ভোট দিয়াটো স্বাভাৱিক।
এতিয়া পুনৰ প্ৰশ্ন হৈছে দুগৰাকীক বাদ দি AIUDF ৰ ১৩ গৰাকী বিধায়কে দ্ৰৌপদী মুৰ্মুৰ প্ৰতি সমৰ্থন জনাই দিলে নেকি ক্ৰছ ভোট?
কিছুসংখ্যকে কংগ্ৰেছৰ প্ৰতিও প্ৰশ্ন উত্থাপন নকৰা নহয়। কংগ্ৰেছৰ পৰা বহিষ্কৃত তিনি বিধায়কৰ বাদেও অন্য কংগ্ৰেছী বিধায়কেও কৰিলে নেকি ক্ৰছ ভোটিং?
এই সন্দৰ্ভত ৰাইজৰ দলৰ উপ সভাপতি ৰাছেল হুছেইনে ফেচবুকযোগে লিখিছে “অসমত NDA ৰ মুঠ শক্তি হ’ল ৭৯। দ্ৰৌপদী মুৰ্মুৱে পালে ১০৪টা ভোট। ক্ৰছ ভোটিং ২৫ টা ।
অৰ্থাৎ যোৱা ৰাজ্যসভাৰ নিৰ্বাচনৰ পৰম্পৰা ৰক্ষা কৰি AIUDF য়ে দিলে ১৩ টা ভোট। ৰহা, কৰিমগঞ্জ দক্ষিণ আৰু বাঘবৰৰ বিদ্ৰোহী কংগ্ৰেছ বিধায়ক ক্ৰমে শশীকান্ত দাস, সিদ্দেক আহমেদ আৰু শ্বেৰমান আলীক লৈ মুঠ ১৬ টা ভোট বিজেপি নেতৃত্বাধীন NDA ত পৰাটো প্ৰায় খাটাং। পিছে আন ৯ জন ছদ্মবেশী বিধায়ক যদি কংগ্ৰেছৰ হয় তেতিয়া হ’লে তেওঁলোকৰ বিৰুদ্ধে দলটোৱে অনতিপলমে ব্যৱস্থা লব লাগে। যদি নোৱাৰে, অন্তত অসমৰ সংসদীয় ৰাজনীতিত তেওঁলোক শেষ”।
এতিয়া কথা হ’ল বিৰোধী বিধায়কৰ ভোট আছিল ৪৫ টা। ২৫ টা ভোট যদি ক্ৰছ হয় তেন্তে ২০ টা বিৰোধী ভোটহে যশোৱন্তই পালে!
