ৰাজ্যত জৰাজীৰ্ণ ৰাষ্ট্ৰীয় ঘাইপথে জীয়াতু ভোগাইছে সাধাৰণ জনতাক। বিশেষকৈ যোৰহাটৰ বাইপাছৰ পৰা পূবে জাঁজী পৰ্যন্ত ৰাষ্ট্ৰীয় ঘাইপথৰ সম্প্ৰসাৰণৰ কাম অতি নিম্নমানৰ হোৱাৰ বাবে সমগ্ৰ পথচোৱাতে দ’ দ’ গাতৰ সৃষ্টি হৈছে। তদুপৰি পথটোৰ বিভিন্ন স্থানত সম্প্ৰসাৰণৰ কাম নকৰাৰ বাবে পথটোৱে জৰাজীৰ্ণ ৰূপ ধাৰণ কৰাত নিতৌ দুৰ্ঘটনা সংঘটিত হৈছে পথচোৱাত।
গাঁতবোৰত পৰি নিতৌ বহু লোক আহত তথা নিহত হৈছে।স্থানীয় ৰাইজে মাটি শিলগুটি দি এই গাঁতবোৰ কিছু পুতিছিল যদিও এয়া পৰ্যাপ্ত হোৱা নাই।
বহুবাৰ সংবাদ মাধ্যম, সামাজিক মাধ্যম তথা দল-সংগঠনে পথ মেৰামতিৰ বাবে দাবী জনাই আহিছিল যদিও কাণসাৰ নাই ৰাষ্ট্ৰীয় ঘাই পথ প্ৰাধিকৰণৰ।
ৰাষ্ট্ৰীয় ঘাইপথৰ এনে দুৰৱস্থাৰ পাছতো ৰাজ্য চৰকাৰৰ খোদ মুখ্যমন্ত্ৰী গৰাকীয়ে এই সমগ্ৰ বিষয়টো কেন্দ্ৰীয় চৰকাৰৰ নিয়ন্ত্ৰণাধীন বুলি কৈ দায়সৰা মন্তব্য দিয়াক লৈও প্ৰতিক্ৰিয়াৰ সৃষ্টি হৈছে।
উল্লেখযোগ্য যে উপ নিৰ্বাচনত শাসনাধিষ্ঠিত চৰকাৰৰ মন্ত্ৰী-বিধায়ক উক্ত পথেৰেই নিতৌ অহা যোৱা কৰাৰ পাছতো নিজে সমগ্ৰ সমস্যা প্ৰত্যক্ষ কৰাৰ পাছতো কি কাৰণে ঠিকাদাৰী সন্থা তথা ঘাই পথ প্ৰাধিকৰণে এই পথ মেৰামতি কৰিবলৈ গুৰুত্ব দিয়া নাই এয়া ৰহস্যজনক বুলি ৰাইজে মন্তব্য কৰিছে ৰাইজে।
আনহাতে,পথছোৱা অনতি পলমে মেৰামতি কৰিবলৈ দাবী জনাই ইয়াৰ অন্যথা উপায়হীন ৰাইজে পথ অৱৰোধ কৰাৰো হুংকাৰ প্ৰদান কৰিছে।
