ৰাজ্যত উন্নয়নৰ শ্লোগান দিয়া বৰ্তমানৰ বিজেপি নেতৃত্বধীন চৰকাৰখনেই হওক বা পূৰ্বৰ চৰকাৰসমূহে হওক গ্ৰামাঞ্চল ৰাইজ তথা দৰিদ্ৰ লোকৰ কল্যানাৰ্থে বহু অভিলাষী আঁচনি গ্ৰহণ কৰি আহিছে কিন্তু প্ৰকৃতাৰ্থত সেয়া প্ৰহসনত পৰিণত হোৱা দেখা গৈছে। সেয়া প্ৰমাণিত কৰিছে নগাঁও জিলাৰ কলিয়াবৰ সংমণ্ডলৰ বৰঘুলী স্থিত নদীৰপাৰ পানী যোগান আঁচনিয়ে।
২০১৬ চনতে আৰম্ভ হোৱা বৰঘূলীৰ নদীৰপাৰ পানী যোগান আঁচনি আৰম্ভণিৰ দুমাহৰ পিছতেই বিকল হৈ পৰে আৰু তেতিয়াৰে পৰা যোৱা তিনি বছৰে মন্ত্ৰী ৰিহন দৈমাৰীৰ জনস্বাস্থ্য কাৰিকৰী বিভাগৰ কোনো কাণসাৰ নাই।
পানী যোগান আঁচনিৰ কেন্দ্ৰটো এতিয়া হাবি-জংঘলেৰে আৱৰি থকাৰ লগতে মল-মূত্ৰৰে কেন্দ্ৰটোৰ কাৰ্যালয় গৃহৰ বাৰান্দা আৰু চৌ-পাশ আৱৰি ধৰিছে।
আনহাতে অতি আশ্চৰ্যকৰ কথাটো হ’ল পানী যোগান আঁচনিৰ কাষৰীয়া গাঁওসমূহত নাই এটাও সাৰ্বজনীন টেপ। পানীৰ বাবে টেপৰ কথা ক’লেই স্থানীয় বাসিন্দাৰ পৰা পানী যোগান কেন্দ্ৰটোৰ তদাৰকৰ দায়িত্বত থকা হাছেন আলিয়ে দুহেজাৰৰ পৰা পাঁচ হাজাৰ টকালৈকে দাবী কৰে ধন। এই অভিযোগ স্থানীয় ৰাইজৰ।
ইফালে পানী যোগানৰ বাবে কোনো ধৰণৰ টেপ সংযোগৰ ব্যৱস্থা নকৰাকৈয়ে দুমাহ কেৱল পানী পাম্প চলাই স্থানীয় অঞ্চলবাসীক আভুৱা ভাৰি থকা কাৰ্যত এতিয়া ক্ষুব্ধ হৈ পৰিছে স্থানীয় ৰাইজ।
ইয়াৰ উপৰি কেন্দ্ৰটোলৈ বিদুৎ সংযোগী ৪৪০ কে ভিৰ তাঁৰ স্থানীয় লোকৰ বাসগৃহৰ ওপৰেদি অনাৰ ফলত স্থানীয় ৰাইজ শংকিত হৈ পৰিছে। এই সন্দৰ্ভতো ব্যৱস্থা গ্ৰহণৰ দাবী জনাইছে স্থানীয় ৰাইজে।
চৰকাৰৰ দূৰদৰ্শিতাৰ অভাৱৰ বাবেই আজি পৰ্যন্ত এটুপি বিশুদ্ধ খোৱা পানীৰ পৰা বঞ্চিত হৈ আহিছে কলিয়াবৰৰ দুই নং বৰঘুলীৰ ধৰ্মীয় সংখ্যালঘু অঞ্চলৰ ৰাইজ।
ইফালে স্থানীয় বিধায়ক তথা ৰাজ্যৰ জল সম্পদ মন্ত্ৰী কেশৱ মহন্তৰো ভূমিকা নিৰাশজনক বুলি স্থানীয় ৰাইজে অভিযোগ কৰিছে।