পাঠশালাৰ কৃতী শিক্ষক সদ্য প্ৰয়াত অৰবিন্দ চৌধুৰীৰ সোঁৱৰণত অলপতে পাঠশালা ৰাইটাৰ্ছ ফ’ৰামৰ উদ্যোগত এক গাম্ভীৰ্যপূৰ্ণ স্মৃতিচাৰণ সভা অনুষ্টিত হয়। যোৱা ১২ ডিচেম্বৰত অনুষ্টিত উক্ত সভাত সভাপতিত্ব কৰি বজালীৰ জ্যেষ্ঠ অধিবক্তা তথা সমাজকৰ্মী গিৰিধৰ চৌধুৰীয়ে কয়, ‘শূন্যৰ পৰা আৰম্ভ কৰি অতি কঠোৰ জীৱন সংগ্ৰামৰ মাজেৰে চৌধুৰীয়ে একমাত্ৰ নিজৰ মেধা, সততা আৰু সাহসৰ বলত জীৱনত প্ৰতিষ্ঠা লাভ কৰিবলৈ সক্ষম হৈছিল।’
অৰবিন্দ চৌধুৰী এগৰাকী আদৰ্শ শিক্ষক আছিল বুলি মন্তব্য কৰি তেওঁ লগতে কয় যে ‘ভুল কৰা মানুহক শুধৰাই’ গঢ় দিয়াৰ ‘আদৰ্শৰে কাম কৰা মানুহ আছিল প্ৰয়াত শিক্ষক চৌধুৰী। তদুপৰি বহু ছাত্ৰক সংস্থাপন প্ৰদানৰ ক্ষেত্ৰত তেওঁৰ অকৃপণ অৱদান আছে।’
প্ৰয়াত চৌধুৰীৰ সহধৰ্মিনী ভৱানী চৌধুৰীয়ে তেওঁৰ প্ৰতিচ্ছৱিত বন্তি প্ৰজ্বলন কৰা সভাখনৰ আঁত ধৰি ৰাইটাৰ্ছ ফ’ৰাম অসমৰ সম্পাদক কবি পুৰন্দৰ পাটগিৰিয়ে কয়, ‘অৰবিন্দ চৌধুৰীৰ অভাৱ শিক্ষক হিচাপে সমগ্ৰ বজালী অঞ্চলতে অনাগত দিনত অভিভাৱকসকলে নিৰন্তৰ অনুভৱ কৰিব।’ ব্যক্তি হিচাপেও তেখেত সৰল মনৰ লোক আছিল। ন্যায়ৰ পক্ষৰ বাবে তেওঁ সৰ্বস্ব ত্যাগ কৰিব পাৰিছিল।’
উল্লেখযোগ্য যে বজালীৰ ছহিদ ৰাউতা-মদন উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ অৰবিন্দ চৌধুৰীৰ যোৱা ২ ডিচেম্বৰত পাঠশালাৰ মিলনপুৰস্থ নিজা বাসগৃহত ষ্ট্ৰ’ক হৈ দেহাৱসান ঘটে। মৃত্যুৰ সময়ত তেওঁৰ বয়স আছিল ৭৫ বছৰ। ১২ ডিচেম্বৰৰ সভাত বৰবালা উচ্চতৰ মাধ্যমিক বিদ্যালয়ৰ অধ্যক্ষ মহিৰুদ্দিন আহমেদ, বজালী কবিতা কাননৰ সভাপতি প্ৰমোদ শৰ্মাকে ধৰি বহুকেইগৰাকী ব্যক্তিয়ে প্ৰয়াত চৌধুৰীৰ স্মৃতি ৰোমন্থন কৰে।
