উত্তৰ প্ৰদেশৰ কানপুৰত সংঘটিত হৈছে এক বিমান দুৰ্ঘটনা। বৃহস্পতিবাৰে দুপৰীয়া প্ৰশিক্ষণৰ সময়ত এটা ব্যক্তিগত কোম্পানীৰ প্ৰশিক্ষণ বিমানখন হঠাৎ দুৰ্ঘটনাগ্ৰস্ত হয়। দুৰ্ঘটনাৰ খবৰ পোৱাৰ পিছতে আৰক্ষী আৰু উদ্ধাৰকাৰী দল উপস্থিত হয়।
সংবাদ সংস্থাৰ সূত্ৰ অনুসৰি বিমানখনত আছিল এজন প্ৰশিক্ষাৰ্থী পাইলট আৰু এজন প্ৰশিক্ষক। দুয়োজনৰে মৃত্যু হয়। এজনৰ থিতাতে মৃত্যু হয়। আনজন পাইলট গুৰুতৰভাৱে আহত অৱস্থাত চিকিৎসালয়লৈ লৈ যোৱা হয়। তাত চিকিৎসাৰ সময়তে তেওঁৰ মৃত্যু হয়। দুৰ্ঘটনাৰ কাৰণ এতিয়াও স্পষ্ট হোৱা নাই। দুৰ্ঘটনাটোৰ তদন্ত আৰম্ভ হৈছে।
সৰ্বভাৰতীয় সংবাদ মাধ্যমত প্ৰকাশিত বাতৰি অনুসৰি বৃহস্পতিবাৰে দুপৰীয়া কানপুৰৰ গংগা বেৰেজৰ সমীপৰ নাথা পুৰৱা গাঁৱৰ পথাৰত এখন প্ৰশিক্ষণ বিমান ভাঙি পৰে। দুৰ্ঘটনাৰ তীব্ৰ শব্দই আতংক বিয়পাই দিয়ে। স্থানীয় ৰাইজে ততাতৈয়াকৈ ঘটনাস্থলীত উপস্থিত হৈ আৰক্ষীক খবৰ দিয়ে।
প্ৰাথমিক তথ্য অনুসৰি এই বিমানখন আছিল প্ৰশিক্ষণৰ উদ্দেশ্যে ব্যৱহাৰ কৰা টুইন ইঞ্জিনযুক্ত প্ৰশিক্ষণ বিমান। জানিব পৰা মতে, দুৰ্ঘটনাৰ সময়ত বিমানখনত এজন প্ৰশিক্ষাৰ্থী পাইলট আৰু এজন প্ৰশিক্ষক আছিল। মাটিত খুন্দা মৰাৰ পিছতে বিমানখন সম্পূৰ্ণৰূপে ছিন্নভিন্ন হৈ পৰে। প্ৰথমতে জনা গৈছে যে দুৰ্ঘটনাগ্ৰস্ত বিমানখন টেকনাম পি২০০৬টি আছিল। এই বিমানখন পৰিচালনা কৰিছিল ‘গৰ্গ এভিয়েশন’ নামৰ এটা কোম্পানীয়ে।
আৰক্ষীৰ সূত্ৰ অনুসৰি এই দুৰ্ঘটনাত নিহত দুজন হৈছে কৰ্ণাটকৰ বাসিন্দা অভিষেক পূজাৰী আৰু গুজৰাটৰ বাসিন্দা সুমিত ভাটিয়া। জনা যায় যে প্ৰশিক্ষক পাইলটজনৰ ৩০০০ ঘণ্টাৰ উৰণৰ অভিজ্ঞতা আছিল।
কানপুৰৰ গংগা বেৰেজৰ সমীপৰ এই অঞ্চলটো ঘন জনবসতিপূৰ্ণ। সেই অঞ্চলৰ সমীপত সংঘটিত হোৱা দুৰ্ঘটনাটোৱে এক বৃহৎ বিপদ ৰোধ কৰা বুলিও অনুমান কৰা হৈছে। যদিহে বিমানখন জনবসতিপূৰ্ণ অঞ্চলত দুৰ্ঘটনাগ্ৰস্ত হ’লহেঁতেন তেন্তে মৃত্যুৰ সংখ্যা আৰু বৃদ্ধি পালেহেঁতেন।
কানপুৰত সংঘটিত বিমান দুৰ্ঘটনাৰ প্ৰকৃত কাৰণ জানিবলৈ তদন্ত আৰম্ভ কৰা হ’ব। বিমানখনৰ ধ্বংসাৱশেষ পৰীক্ষা কৰি যান্ত্ৰিক ত্ৰুটি আছিল নেকি সেইটো নিৰ্ণয় কৰা হ’ব। একে সময়তে বিমানখনৰ উৰণৰ পূৰ্বে কেনেধৰণৰ পৰীক্ষা কৰা হৈছিলনে নাই আৰু প্ৰশিক্ষণৰ সময়ত নিৰ্ধাৰিত সুৰক্ষা নিয়ম মানি চলিছিল নে নাই সেই বিষয়েও তদন্তকাৰীয়ে পৰীক্ষা কৰিব।
কানপুৰত চলিত বৰ্ষত সংঘটিত এইটো আন এক প্ৰশিক্ষণ বিমান দুৰ্ঘটনা। জুন মাহত কানপুৰৰ চাকেৰী বিমানবন্দৰত প্ৰশিক্ষণ লৈ বিমানখনৰ পৰা নামি থকা অৱস্থাত এগৰাকী মহিলা প্ৰশিক্ষাৰ্থী পাইলটে চলন্ত প্ৰপেলাৰত আঘাত পাইছিল। এই ঘটনাত তেওঁ গুৰুতৰভাৱে আহত হয়। ডিজিচিএই ঘটনা সন্দৰ্ভত তদন্তৰ নিৰ্দেশ দিয়াৰ লগতে তদন্তৰ সময়ত সংশ্লিষ্ট প্ৰশিক্ষকজনক প্ৰশিক্ষণৰ কৰ্তব্যৰ পৰা আঁতৰাই দিয়া হৈছিল।
ইয়াৰ কিছুদিন পিছতে উত্তৰ প্ৰদেশৰ কাছগঞ্জত এখন প্ৰশিক্ষণ বিমানে জৰুৰীভাৱে অৱতৰণ কৰিছিল। সেই ঘটনাত পাইলট নিৰাপদে আছিল। ফলত বাৰে বাৰে এনেধৰণৰ ঘটনাত প্রশিক্ষণ বিমানৰ সুৰক্ষা ব্যৱস্থাক লৈ প্রশ্ন উত্থাপন হৈছে৷
