দেশৰ ক্ৰীড়াক্ষেত্ৰত অসমৰ খেলুৱৈৰ জয়যাত্ৰা অব্যাহত থকাৰ মাজতে ৰাজ্যখনলৈ পুনৰ এক সুখবৰ কঢ়িয়াই আনিছে ডিব্ৰুগড়ৰ এজন প্ৰতিভাৱান ক্ৰীড়াবিদে। পশ্চিমবংগৰ ৰূপনাৰায়ণপুৰত অনুষ্ঠিত হোৱা দশম ৰাষ্ট্ৰীয় কুংফু চেম্পিয়নশ্বিপ ২০২৫-ত মৰাণৰ পিংকু লাহনে সোণৰ পদক জয় কৰি অসমলৈ গৌৰৱ কঢ়িয়াই আনিছে। কঠোৰ পৰিশ্ৰম আৰু একাগ্ৰতাৰ বলত ৰাষ্ট্ৰীয় পৰ্যায়ত অৰ্জন কৰা এই বৃহৎ সাফল্যই এতিয়া সমগ্ৰ ৰাজ্যৰ ক্ৰীড়াপ্ৰেমীসকলক উৎসাহিত কৰি তুলিছে।
ডিব্ৰুগড় জিলাৰ ধেমেচী হালধিবাৰী গাঁৱৰ ললিত লাহনৰ পুত্ৰ পিংকু লাহনে ৫০ কেজি শাখাত অসম দলক প্ৰতিনিধিত্ব কৰি সোণৰ পদক লাভ কৰে। কেৱল সোণৰ পদকেই নহয়, সমগ্ৰ প্ৰতিযোগিতাখনৰ ভিতৰত তেওঁ ‘বেষ্ট ফাইটাৰ’ (Best Fighter) সন্মান লাভ কৰি সকলোৰে দৃষ্টি আকৰ্ষণ কৰিবলৈ সক্ষম হয়। এজন দিন-হাজিৰা কৰা পিতৃৰ সন্তান পিংকুৰ বাবে এই যাত্ৰা সহজ নাছিল। পৰিয়ালৰ আৰ্থিক দুৰৱস্থাৰ মাজতো অদম্য সাহস আৰু একাগ্ৰতাৰ বলত তেওঁ আজি এই সফলতাৰ শিখৰত উপনীত হৈছে।
সাফল্য অৰ্জনৰ পাছত আবেগিক হৈ পিংকু লাহনে কয় যে “দেউতাই যিহেতু দিন-হাজিৰা কৰে, সেয়ে আৰ্থিকভাৱে আমাৰ বহুত সমস্যা হয়। মা-দেউতাই অতি কষ্ট কৰি মোক খেলিবলৈ পঠাইছে। ইয়াৰ পূৰ্বেও মই ৰাষ্ট্ৰীয় পৰ্যায়ত সোণৰ পদক লাভ কৰিছোঁ, কিন্তু এইবাৰ ‘বেষ্ট ফাইটাৰ’ৰ সন্মান পোৱাত মই অধিক সুখী।” খেলুৱৈগৰাকীয়ে তেওঁৰ এই সফলতাত বিজেপি নেতা ৰঞ্জিত বৰুৱাই আগবঢ়োৱা আৰ্থিক সহযোগিতাৰ কথাও কৃতজ্ঞতাৰে সোঁৱৰণ কৰে।
পিংকুৰ এই সফলতাত মৰাণৰ লগতে সমগ্ৰ ধেমেচী অঞ্চলত এক আনন্দৰ পৰিৱেশে বিৰাজ কৰিছে। জ্যেষ্ঠ বিজেপি নেতা তথা সমাজকৰ্মী ৰঞ্জিত বৰুৱাই খেলুৱৈগৰাকীক তেওঁৰ বাসগৃহত উপস্থিত হৈ সম্বৰ্ধনা জনায়। বৰুৱাই সংবাদ মাধ্যমৰ আগত কয়— “নতুন বছৰৰ আৰম্ভণিতে এয়া সমগ্ৰ অসমবাসীৰ বাবে এটা ভাল খবৰ। এজন প্ৰতিভাৱান যুৱকে ৰাষ্ট্ৰীয় পৰ্যায়ত সুনাম অৰ্জন কৰিছে। আমি আশা কৰিছোঁ ভৱিষ্যতে পিংকুৱে বিশ্বৰ ক্ৰীড়াক্ষেত্ৰতো উজলি উঠিব।”
দৰিদ্ৰতাক জয় কৰি পিংকুৱে কঢ়িয়াই অনা এই সফলতা এতিয়া ৰাজ্যৰ সহস্ৰাধিক উদীয়মান ক্ৰীড়াবিদৰ বাবে প্ৰেৰণাৰ উৎস হৈ পৰিছে।
