প্ৰাকৃতিক ভাৰসাম্য ৰক্ষা আৰু সৌন্দৰ্যবৰ্ধনৰ বাবে অক্লান্ত প্ৰচেষ্টা বঙাইগাঁৱৰ একাংশ যুৱক-যুৱতীৰ

বঙাইগাঁৱৰ ব্যতিক্ৰম নামৰ এক ৱাটচএপ গ্ৰুপৰ সদস্য সকলৰ লগতে স্থানীয় ব্যক্তি,সচেতন লোকসকলে উত্তৰ শালমাৰা– বঙাইগাঁও ৰাজ্যিক ঘাইপথৰ দুয়ো কাষে প্ৰাকৃতিক ভাৰসাম্য ৰক্ষাৰ লক্ষ্য- উদ্দেশ্য আৰু সৌন্দৰ্যবৰ্ধনৰ বাবে সেউজ বঙাইগাঁৱৰ লক্ষ্যৰে গছ পুলি ৰোপণ কৰিছে ৷

পুৰণি বঙাইগাঁৱৰ সচেতন যুৱক আৰু সচেতন লোকসকলে সোণাৰু, কৃষ্ণচূড়া, ৰাধাচূড়াৰ গছপুলি ৰোপণ কৰে৷ প্ৰথম পৰ্যায়ত হাতীমূত্ৰাৰ পৰা পুৰণি বঙাইগাঁও চ’কলৈ এক কিলোমিটাৰ পথৰ দুয়োকাষে এই গছপুলি ৰোপণ কৰে৷

উল্লেখ্য যে ৰাজ্যিক ঘাইপথ নিৰ্মাণ কৰাৰ সময়ত পথৰ দুয়োকাষে থকা অঞ্চলটোৰ বহু গছ কাটি পথচোৱা বহল কৰি নিৰ্মাণ কৰাৰ পিছত পথৰ দুয়ো কাষে কোনো গছ নথকাত সচেতন যুৱক সকলে এক পৰিকল্পনা কৰি উক্ত অঞ্চল প্ৰাকৃতিক ভাবে সুন্দৰ কৰি গঢ় দিবলৈ আগবাঢ়ি আহে৷
বিভিন্ন ৰাইজৰ দান -বৰঙণিৰে এনেদৰে গছপুলি ৰোপণ কৰে ৷

অকল গছ পুলি ৰোপণতে দায়িত্ব সামৰি নথৈ অহা পাঁচ বছৰলৈ যুৱকসকলে প্ৰতিপালন আৰু যত্নৰো দায়িত্ব গ্ৰহণ কৰা বুলি জানিবলৈ দিছে।

গছ পুলি ৰোপণ কাৰ্যসূচীত সমাজকৰ্মী,সচেতন যুৱক- যুৱতীৰ লগতে সংবাদিক, শিল্পী – সাহিত্যিত, ৰাজনৈতিক নেতা, যুৱ ব্যৱসায়ী, শিক্ষক – কৰ্মচাৰী আৰু প্ৰকৃতিপ্ৰেমী লোকসকলে অংশ গ্ৰহণ কৰি গছ পুলি ৰোপণ কৰাৰ লগতে প্ৰতিগৰাকীয়ে ৪- ৫ ডালকৈ গছপুলিৰ যত্ন লোৱাৰ দায়িত্ব গ্ৰহণ কৰে ৷

ক’ভিড পৰিস্থিতিৰ মাজতে অঞ্চলটোৰ যুৱকসকলৰ এই পদক্ষেপক প্ৰকৃতিপ্ৰেমী সচেতন ৰাইজে প্ৰশংসা কৰিছে ৷