দেশৰ প্ৰথমখন ‘ভাৰ্টিকেল-লিফ্ট’ দলং। জাহাজৰ বাবে পথ সৃষ্টি কৰিবলৈ ই উলম্বভাৱে খুলি যাব। ৰাম নৱমীৰ দিনা দেওবাৰে তামিলনাডুত প্ৰধানমন্ত্ৰী নৰেন্দ্ৰ মোদীয়ে উদ্বোধন কৰে পাম্বান দলং।
ৰামনাথপুৰম জিলাত অৱস্থিত এই দলঙে ৰামেশ্বৰম দ্বীপক দেশৰ মূল ভূখণ্ড মণ্ডপমৰ সৈতে সংযোগ কৰিছে। ইয়াৰ ওপৰেৰে যেনেকৈ ৰে’ল চলিব, জাহাজবোৰো সহজে তলেৰে পাৰ হ’ব।
অৱশ্যে দেওবাৰৰ এই অনুষ্ঠানত দেখা পোৱা নগ’ল তামিলনাডুৰ মুখ্যমন্ত্ৰী এম কে ষ্টেলিনক। স্বচ্ছভাৱে আসন পুনৰ আবণ্টনৰ (Delimitation) দাবীত তেওঁ দলং উদ্বোধনী অনুষ্ঠান বৰ্জন কৰে।
তিনিদিনীয়া শ্ৰীলংকা ভ্ৰমণৰ অন্তত দেওবাৰে তামিলনাডুত উপস্থিত হয় প্ৰধানমন্ত্ৰী মোদী। পিছত দলংখন উদ্বোধনৰ লগতে তেওঁ উপকূল ৰক্ষীৰ জাহাজ আৰু ৰামেশ্বৰম-তাম্বৰম ৰে’লখনো উদ্বোধন কৰে। জানিব পৰা মতে, ৰামেশ্বৰৰ ৰামানাথস্বামী মন্দিৰত পূজা আগবঢ়োৱাৰ পিছত ৰাজ্যত মুঠ প্ৰায় ৮৩০০ কোটি টকাৰ ৰে’ল আৰু পথ প্ৰকল্পৰ আধাৰশিলা স্থাপন কৰে।
১৯১৪ চনত ব্ৰিটিছ অভিযন্তাই নিৰ্মাণ কৰিছিল পাম্বান দলং। কিন্তু বৰ্তমান পুৰণি দলংখন অসাৰ হৈ পৰিছে। আৰু এই ২.৮ কিলোমিটাৰ দৈৰ্ঘ্যৰ দলংখন সেই স্থানত ৭০০ কোটি টকা ব্যয় কৰি নিৰ্মাণ কৰা হৈছে।
ইয়াৰ মাজভাগত জাহাজ চলোৱা পথ মুকলি কৰি ৰাখিবলৈ ৭২.৫ মিটাৰ দীঘল উলম্ব অংশ এটা নিৰ্মাণ কৰা হৈছে। যি জলপৃষ্ঠৰ পৰা ১৭ মিটাৰ ওপৰলৈ উঠিব আৰু তলেৰে জাহাজ পাৰ হ’বলৈ ঠাই উলিয়াই দিব। দলংখনৰ দুটা ৰে’লপথো আছে। যাৰ ওপৰেৰে ঘণ্টাত ৮০ কিলোমিটাৰ বেগত চলিব ৰে’ল। ইয়াক বিশেষ প্ৰযুক্তিৰে তৈয়াৰ কৰা হৈছে যি অতি আৰ্দ্ৰ বতৰতো দীৰ্ঘদিন ধৰি অক্ষত আৰু শক্তিশালী হৈ থাকিব।
আসন পুনৰ আবণ্টনৰ দাবীত দেওবাৰে তামিলনাডুৰ মুখ্যমন্ত্ৰী এম কে ষ্টেলিনে দলং উদ্বোধনী অনুষ্ঠান বৰ্জন কৰে। তেওঁ কয়, “তামিলনাডুৰ মাটিত থিয় হৈ প্ৰধানমন্ত্ৰীয়ে স্বচ্ছতাৰে আসন পুনৰ আবণ্টনৰ নিশ্চয়তা দিব লাগিব। প্ৰয়োজন হ’লে সংসদত প্ৰস্তাৱ গৃহীত কৰি ব্যৱস্থা ল’ব লাগিব। প্ৰধানমন্ত্ৰী নৰেন্দ্ৰ মোদীয়ে ৰাজ্যবাসীৰ আশংকা দূৰ কৰিবলৈ ৰাজহুৱা প্ৰতিশ্ৰুতি দিব লাগিব।”
