কাশ্মীৰৰ ৰাজনৈতিক দৃশ্যপট উত্তপ্ত হৈ থকাৰ সময়তে প্ৰধানমন্ত্ৰী নৰেন্দ্ৰ মোদীয়ে অহা ২৪ জুনত আহ্বান কৰিছে কাশ্মীৰৰ ৰাজনৈতিক দলসমূহৰ সৰ্বদলীয় বৈঠক।
এই বৈঠকতে হয়তো কাশ্মীৰক পুনৰ পূৰ্ণাংগ ৰাজ্যৰ হৃত মৰ্যাদা ওভতাই দিয়াৰ বিষয়টো আলোচনা হ’ব পাৰে। এক বিশেষ সূত্ৰই তেনে ইংগিতেই দিছে।
উল্লেখ্য কাশ্মীৰক চৰকাৰে দুটাকৈ কেন্দ্ৰীয় শাসিত অঞ্চলত ভাগ কৰি ৰাজ্য খনৰ ৰাজ্যৰ মৰ্যাদা কৰ্তন কৰা হৈছিল। ইয়াকেলৈ কাশ্মীৰৰ বিভিন্ন দল-সংগঠনে প্ৰতিবাদ কৰি আহিছে।
ইয়াৰোপৰি সৰ্বদলীয় বৈঠকত কাশ্মীৰৰ বিধানসভা নিৰ্বাচনকলৈও আলোচনা হোৱাৰ পূৰ্ণ সম্ভাৱনা আছে। অৱশ্যে এতিয়ালৈকে চৰকাৰী ভাবে কোনো দলকে আলোচনালৈ আমন্ত্ৰণ জনোৱা হোৱা নাই যদিও মেহবুবা মুফটিয়ে প্ৰকাশ কৰা মতে তেওঁ অনানুষ্ঠানিক ভাবে আমন্ত্ৰণ লাভ কৰিছে।
বিষেষ সূত্ৰটোৱে দাবী কৰা মতে অহা নৱেম্বৰ মাহতে কাশ্মীৰত বিধানসভা নিৰ্বাচন অনুষ্ঠিত হোৱাৰ সম্ভাৱনা আছে।
উল্লেখ্য সংবিধানৰ ৩৭০ অনুচ্ছেদ প্ৰত্যাহাৰকলৈ অশান্ত হৈ থকা কাশ্মীৰত এইবাৰ বিধানসভা নিৰ্বাচন অনুষ্ঠিত কৰাৰ বাবে তৎপৰ হৈ পৰিছে কেন্দ্ৰীয় চৰকাৰ।
সূত্ৰটোৱে প্ৰকাশ কৰা অনুসৰি কাশ্মীৰৰ কেইবাটাও ৰাজনৈতিক দলৰ সন্মিলনত জন্ম হোৱা গুপকাৰ মিত্ৰজোঁটৰ সৈতে কেন্দ্ৰীয় চৰকাৰে এই বিষয়ত শীঘ্ৰে আলোচনা কৰিব ।
উল্লেখ্য কাশ্মীৰৰ পৰা সংবিধানৰ ৩৭০ অনুচ্ছেদ বাতিলৰ পিছত এয়াই হ’ব বিধানসভাৰ প্ৰথম নিৰ্বাচন।
উল্লেখ্য কিছুদিন পূৰ্বে কাশ্মীৰত জিলা উন্নয়ন পৰিষদৰ নিৰ্বাচন অনুষ্ঠিত হৈ গৈছে।
উক্ত নিৰ্বাচনত গুপকাৰ মিত্ৰজোঁটে ১০০ খনৰো অধিক আসন লাভ কৰাৰ লগতে বিজেপিয়ে লাভ কৰিছিল ৭৪ খন আসন।কাশ্মীৰত বিজেপিয়ে অভাৱনীয় সফলতা লাভ কৰাৰ পিছতে সেয়ে হয়তো কেন্দ্ৰই ৰাজ্য খনত নিৰ্বাচন অনুষ্ঠিত কৰাৰ বাবে আগ্ৰহী হৈ উঠিছে।
ইপিনে দিল্লীৰ সৈতে এঘৰী যুঁজাৰ বাবে সাজু হৈছিল কাশ্মীৰ উপত্যকাৰ ছটাকৈ বিৰোধী ৰাজনৈতিক।
কাশ্মীৰত পুনৰ সংবিধানৰ ৩৭০ অনুচ্ছেদ প্ৰৱৰ্তন কৰাৰ দাবীৰে ঐক্যৱদ্ধ হোৱা দল কেইটাই এইবুলি অভিযোগ কৰি আহিছে যে ২০১৯ চনৰ ৫ আগষ্টৰ দিনা কেন্দ্ৰীয় চৰকাৰে কাশ্মীৰৰ পৰা সংবিধানৰ ৩৭০ অনুচ্ছেদৰ লগতে ৩৫(ক) অনুচ্ছেদ বাতিল কৰি কাশ্মীৰী জনতাৰ অধিকাৰ কাঢ়ি নিছে।
কাশ্মীৰৰ জনতাক তেওঁলোকে হেৰুওৱা অধিকাৰ পুনৰ ঘূৰাই দিয়াৰ বাবেই কাশ্মীৰত শীঘ্ৰে সংবিধানৰ ৩৭০ আৰু ৩৫(ক) অনুচ্ছেদ প্ৰৱৰ্তন কৰাৰ দাবী উত্থাপন কৰি আহিছে দল কেইটাই।
সংবিধানৰ ৩৭০ অনুচ্ছেদ বিলোপৰ বিৰুদ্ধে থিয় দিয়া ৬ টা দলৰ ভিতৰত দুটা সৰ্বভাৰতীয় দল ক্ৰমে কংগ্ৰেছ আৰু চিপিএমো আছে।
বিৰোধী ঐক্যত থকা আন দল কেইটা হৈছে ক্ৰমে নেছনেল কনফাৰেন্স,পিপ’লছ ডেম’ক্ৰেটিক পাৰ্টী,আৱামী নেছনেল কনফাৰেন্স আৰু জম্মু-কাশ্মীৰ পিপ’লছ কনফাৰেন্স।
উল্লেখ্য ২০১৮ চনত বিজেপিয়ে মেহবুবা মুফটিৰ চৰকাৰৰ পৰা সমৰ্থন প্ৰত্যাহাৰ কৰাৰ পিছৰে পৰা কাশ্মীৰত ৰাষ্ট্ৰপতিৰ শাসন চলি আছে।
