দেশৰ ৰাজধানী চহৰ নতুন দিল্লীত এইবাৰ দুস্কৃতিকাৰীৰ চিকাৰ হ’ল স্বয়ং প্ৰধান মন্ত্ৰী নৰেন্দ্ৰ মোদীৰ ভতিজী ছোৱালী।
ঘটনাটোক কেন্দ্ৰ কৰি প্ৰশাসনিক মহলত তীব্ৰ আলোড়নৰ সৃষ্টি হৈছে। তদুপৰি, ঘটনাস্থলী দিল্লীৰ মুখ্য মন্ত্ৰী অৰবিন্দ কেজৰিৱালৰ বাসগৃহৰ কাষত হোৱাৰ বাবে বিতৰ্কই অধিক মাত্ৰা লাভ কৰিছে।
স্থানীয় সূত্ৰই জানিব দিয়া মতে নৰেন্দ্ৰ মোদীৰ ভাতৃ প্ৰহ্লাদ ভাই মোদীৰ কন্যা দময়ন্তী বেন মোদীয়ে শনিবাৰে ৰাতিপুৱাই পঞ্জাৱৰ অমৃতসৰৰ পৰা দিল্লীলৈ আহিছিল।
চিভিল লাইন অঞ্চলত অৱস্থিত গুজৰাটী সমাজ ভৱনত এটা কোঠাও তেওঁৰ নামত বুক কৰি ৰখা হৈছিল।
গুজৰাটী সমাজ ভৱনৰ গেইটৰ বাহিৰত গাড়ীৰ পৰা নামি ভিতৰলৈ সোমাবলৈ ধৰাৰ সময়তে তেওঁক লক্ষ্য কৰি দুজন দুস্কৃতিকাৰীয়ে চোচা লয়।
বাইকত অহা দুস্কৃতিকাৰী দুজনে তেওঁৰ হাতত থকা বেগটো কাঢ়ি লৈ পলাই যায়। ঘটনাৰ পাছতেই চিভিল লাইন অঞ্চলত থকা আৰক্ষী থানালৈ গৈ প্ৰধান মন্ত্ৰীৰ ভতিজীয়ে অভিযোগ দাখিল কৰে।
দময়ন্তী বেন মোদীয়ে অভিযোগ কৰে যে গুজৰাটী সমাজ ভৱনৰ গেইটৰ ভিতৰলৈ সোমাব ধৰাৰ সময়তে বাইকত অহা দুজন দুস্কৃতিকাৰীয়ে তেওঁৰ হাতৰ পৰা বেগটো কাঢ়ি লৈ যায়।
বেগখনত নগদ ৫৬,০০০ টকা, দুটা মোবাইল ফোন আৰু কিছুমান গুৰুত্বপূৰ্ণ নথিপত্ৰ আছিল। নথিপত্ৰ হেৰুওৱাৰ বাবেই তেওঁ শনিবাৰে সন্ধিয়া বিমানত উভতি যাব নোৱাৰিলে।
শেহতীয়াকৈ দিল্লীত পথচাৰীৰ পৰা বেগ কাঢ়ি নিয়া, মহিলাৰ ডিঙিৰ চেইন কাঢ়ি নিয়াকে ধৰি ৰাজধানী চহৰখনত দুস্কৃতিকাৰীৰ উপদ্ৰৱ বৃদ্ধি পাইছে।
এতিয়া প্ৰশ্ন উঠিছে, যদি দেশৰ প্ৰধান মন্ত্ৰীৰ ভতিজীৰেই এনে অৱস্থা হয় তেনেহ’লে বাকী সাধাৰণৰ নাগৰিকৰ কি হ’ব?