তৃতীয়বাৰৰ বাবে প্ৰধানমন্ত্ৰী হোৱাৰ পাছত মঙলবাৰে প্ৰথমবাৰৰ বাবে বাৰাণসী ভ্ৰমণ কৰে নৰেন্দ্ৰ মোদীয়ে। তাৰ পৰাই তেওঁ কৃষকৰ বাবে প্ৰধানমন্ত্ৰী কিষাণ সন্মান নিধি যোজনাৰ সপ্তদশ কিস্তিৰ বাবে ধন মুকলি কৰে। ৯.৩ কোটি কৃষকৰ একাউণ্টত ২০ হাজাৰ কোটি টকা ধনৰাশি প্ৰদান কৰা হয়।
উল্লেখ্য যে বাৰাণসীৰ পৰা লোকসভা নিৰ্বাচনত প্ৰতিদ্বন্দ্বিতা কৰিছিল নৰেন্দ্ৰ মোদীয়ে। জয়ী হোৱাৰ পাছত তেওঁ নিজৰ সংসদীয় সমষ্টিৰ পৰা কৃষকৰ বাবে পি এম কিষানৰ কিস্তি দিয়ে। কেন্দ্ৰীয় চৰকাৰৰ এই আঁচনিখনত কৃষকসকলক প্ৰতি চাৰি মাহৰ মূৰে মূৰে ২০০০ টকাৰ আৰ্থিক সাহায্য দিয়া হয়। ইয়াৰ পূৰ্বে এই প্ৰকল্পৰ ১৬ সংখ্যক কিস্তি যোৱা ফেব্ৰুৱাৰী মাহত প্ৰদান কৰা হৈছিল। তাৰ পাছত আৰম্ভ হ’ল লোকসভা নিৰ্বাচন। নিৰ্বাচন শেষ হোৱাৰ পিছতে সপ্তদশ কিস্তিৰ ধন পৰিশোধ কৰা হয়।
তৃতীয়বাৰৰ বাবে প্ৰধানমন্ত্ৰী হিচাপে নৰেন্দ্ৰ মোদীয়ে প্ৰথমে কিষাণ সন্মান নিধি আঁচনিৰ সৈতে জড়িত ফাইলত স্বাক্ষৰ কৰে৷ ১০ জুনত এই ফাইলত স্বাক্ষৰ কৰে প্ৰধানমন্ত্ৰীয়ে। এসপ্তাহৰ ভিতৰতে বাৰাণসীৰ পৰা টকাখিনি কৃষকৰ একাউণ্টলৈ ট্ৰেন্সফাৰ কৰা হয়।
