সৌন্দৰ্য্য প্ৰতিযোগিতাত এগৰাকী প্ৰতিযোগীয়ে প্ৰশ্নোত্তৰ কালৰ এটা প্ৰশ্নত প্ৰধান মন্ত্ৰী মোদীক কটাক্ষ কৰি দিয়া উত্তৰে ছ’চিয়েল মিডিয়াত এক প্ৰকাৰৰ আলোড়ন সৃষ্টি কৰিছে।
টুইটাৰ য়ুজাৰসকলে অষ্টাদশী সুন্দৰীগৰাকীৰ সৎ সাহস আৰু স্পষ্টবাদিতাক প্ৰশংসা কৰা দেখা গৈছে।
উত্তৰ-পূবৰ এই সুন্দৰীগৰাকী হ’ল নাগালেণ্ডৰ ভিকৌনৌ ছাচ্চু আৰু তেওঁ ৫ অক্টোবৰত মিছ কহিমা-২০১৯ সৌন্দৰ্য্য প্ৰতিযোগিতাৰ এগৰাকী প্ৰতিযোগী আছিল।
দ্বিতীয় ৰানাৰ-আপৰ খিতাপ লাভ কৰা ছাচ্চুক ব্যক্তিগত আলাপ (personal interaction) পৰ্য্যায়টোত সোধা হৈছিল, “যদি আমাৰ দেশৰ প্ৰধান মন্ত্ৰী মোদীয়ে তোমাক তেওঁৰ সৈতে বাৰ্তালাপ কৰিবলৈ আমন্ত্ৰণ কৰে, তুমি কি ক’বা?”
কোনো পলম নকৰাকৈ অষ্টাদশী ভিকৌনৌ ছাচ্চুৰ উত্তৰ আহিল কটাক্ষভৰা, “যদি মোক ভাৰতৰ প্ৰধান মন্ত্ৰীয়ে আমন্ত্ৰণ কৰিলে হেঁতেন, মই তেওঁক গাইতকৈ মহিলাৰ ওপৰত অধিক গুৰুত্ব আৰোপ কৰিবলৈ ক’লো হেঁতেন”।
ছাচ্চুৰ এই কটাক্ষভৰা উত্তৰ ছ’চিয়েল মিডিয়াত এতিয়াও চৰ্চাৰ মাজত আছে আৰু টুইটাৰত তেওঁৰ উত্তৰটো বিভিন্নজনে শ্বেয়াৰ কৰিছে।
বহুতো টুইটাৰ য়ুজাৰে তেওঁৰ স্পষ্টবাদিতাক প্ৰশংসা কৰাৰ উপৰি, অধিক ৰসিকতা কৰাও দেখা গৈছে।
শীতল গডগিল নামৰ এগৰাকী য়ুজাৰৰ মন্তব্য, “তেওঁ প্ৰকৃত মিছ ইণ্ডিয়া হ’ব পাৰে। আশা কৰো তেওঁ প্ৰতিযোগিতাখনত জয়ী হৈছে।“
“Big round of applause for her”, ওছামা নিয়াজ নামৰ আন এজনৰ মন্তব্য।
কামাথ নামৰ এজনে কৈছে, “এয়া হৈছে আত্মবিশ্বাস আৰু সাহস, যিটো আনকি আজিকালিৰ বতৰৰ সাংবাদিকসকলৰো নাথাকে।“
সৌন্দৰ্য্য প্ৰতিযোগিতাত বিজয়ী হ’ব নোৱাৰিলেও ভিকৌনৌ ছাচ্চু এতিয়া এই উত্তৰৰ বাবেই ৰাষ্ট্ৰীয় পৰ্য্যায়ৰ সংবাদ মাধ্যমবোৰতো বাতৰিৰ শিৰোনাম হোৱা দেখা গৈছে।
২০১৪ চনত দেশৰ শাসনলৈ বিজেপি চৰকাৰখন অহাৰ পিছত গোটেই দেশজুৰি গৰু পূজা আৰু গৰু মাংস কেন্দ্ৰিক বিবাদময় পৰিৱেশ সৃষ্টি কৰি বহুতৰ বিৰক্তি উদঘাটন কৰিছিল। গোমাংস খোৱা আৰু ৰখাৰ অভিযোগত হিন্দুত্ববাদীসকলে মৰিয়াই মাৰিছিল একাধিক লোকক।
প্ৰতিযোগীগৰাকীৰ ৰাজ্য নাগালেণ্ড এখন খ্ৰীষ্টান প্ৰধান ৰাজ্য আৰু গৰুৰ মাংস নাগাসকলৰ প্ৰিয়।
প্ৰতিযোগিতাখনত খ্ৰীয়েইনৌ লিজেইটছৌৱে (Khrienuo Liezietsu) খিতাপ লাভ কৰিছিল আৰু খ্ৰীয়েইলিভিনৌ শ্বোহু (Khrielievinuo Shohu) প্ৰথম ৰানাৰ-আপ হৈছিল।
