শুকুৰবাৰে নিশা ভাৰতৰ দ্বিতীয় চন্দ্ৰ অভিযানৰ অন্তিম পৰ্য্যায়ত লেণ্ডাৰ বিক্ৰমে ইছৰোৰ কণ্ট্ৰ’ল ৰুমৰ সৈতে সংযোগ বিচ্ছিন্ন হোৱাৰ পাছত শনিবাৰে ৰাতিপুৱাই ইছৰোৰ বাংগালুৰুস্থিত মুখ্য কাৰ্য্যালয়ত দেশৰ বিজ্ঞানীসকলক উৎসাহ জগোৱাৰ বাবে পুনৰবাৰ উপস্থিত হয় দেশৰ প্ৰধান মন্ত্ৰী নৰেন্দ্ৰ মোদী।
ৰাতিপুৱা ইছৰোৰৰ মুখ্য কাৰ্য্যালয়ত বিজ্ঞানীসকলক সম্বোধন কৰি দিয়া ভাষণত প্রধান মন্ত্ৰী মোদীয়ে সমগ্ৰ দেশ ইছৰোৰ সৈতে আছে বুলি মন্তব্য কৰে।
Addressing our hardworking space scientists. Watch. https://t.co/rPRfGBQLJQ
— Narendra Modi (@narendramodi) September 7, 2019
‘‘সমগ্ৰ দেশে চন্দ্ৰ অভিযানক লৈ গৌৰৱ কৰিছে, আমি ইয়াৰ পৰা নতুন শিক্ষা গ্ৰহণ কৰিব পাৰিছো আৰু সেই শিক্ষাৰ বলতে ভবিষ্যতে আমি পুনৰ নতুন নতুন ঠাইলৈ অভিযান আৰম্ভ কৰিব লাগিব। বিজ্ঞানত ব্যৰ্থতা নাই, বিজ্ঞান হ’ল পৰীক্ষা আৰু প্ৰয়োগৰ সংমিশ্ৰণ।’’-প্ৰধান মন্ত্ৰীয়ে বিজ্ঞানীসকলক উৎসাহ প্ৰদান কৰি কয়।
আনহাতে, প্ৰথমটো প্ৰয়াসতে মঙল গ্ৰহলৈ সফল অভিযান চলোৱা, একেলগে ১০০ টা উপগ্ৰহ উক্ষেপন কৰা আদিকে ধৰি সফলতাৰ অভিধান ইছৰোৰ নামত থকাৰ পাছত ইছৰোৰ নিৰাশ হ’বলগীয়া কোনোধৰণৰ কথা নাই বুলিও মোদীয়ে উল্লেখ কৰে।
তদুপৰি, ভাৰতীয় মহাকাশ গৱেষণা সংস্থাৰ আটাইতকৈ সৰ্বশ্ৰেষ্ঠ সফলতা আহিবলৈ এতিয়াও বাকী আছে বুলি কৈ বিজ্ঞানীসকলৰ ত্যাগ আৰু কষ্টৰ সলাগ লয় মোদীয়ে।
মোদীয়ে উপদেশ দিবৰ বাবে নহয় বিজ্ঞানীসকলৰ পৰা অনুপ্ৰেৰণা ল’বৰ বাবেহে পুনৰ তেওঁলোকৰ মাজলৈ আহিছে বুলি উল্লেখ কৰে।
প্ৰধান মন্ত্ৰীয়ে ইছৰোৰৰ বিজ্ঞানীসকলক উদ্দেশ্য কৰি কয় ”আপোনালোক হৈছে অনুপ্ৰেৰণাৰ সাগৰ আপোনালোকৰ প্ৰয়াস, ত্যাগ, জ্ঞান আৰু কষ্টৰ বলত আজি ভাৰতে পৃথিৱীৰ শ্ৰেষ্ঠ মহাকাশ গৱেষণা সংস্থা সমূহৰ ভিতৰত নাম অন্তৰ্ভুক্ত কৰিবলৈ সক্ষম হৈছে।”
লগতে পঢ়ক : চন্দ্ৰলৈ আৰু এঢাপ; চন্দ্ৰযান-২ৰ পৰা বিচ্ছিন্ন ‘বিক্ৰম’
উল্লেখযোগ্য যে, প্রধান মন্ত্ৰী মোদীয়ে ভাষণ সমাপ্ত কৰিয়ে ইছৰোৰ কাৰ্য্যালয়ত চন্দ্ৰ অভিযানৰ সৈতে জড়িত হৈ থকা প্ৰতিগৰাকী ব্যক্তিক ব্যক্তিগতভাৱে কৰমৰ্দন কৰে আৰু অধ্যক্ষ কে শিৱানক ধন্যাবদ জ্ঞাপন কৰে।
শুকুৰবাৰে নিশাও প্ৰধান মন্ত্ৰী নৰেন্দ্ৰ মোদীয়ে ইছোৰৰ বিজ্ঞানীসকলৰ সৈতে ইছৰোৰ মুখ্য কাৰ্য্যালয়ত উপস্থিত আছিল।