কাষ চাপিছে ২৪ৰ লোকসভা নিৰ্বাচন। নিৰ্বাচনৰ পূৰ্বে অহা ২২ জানুৱাৰীত উত্তৰ প্ৰদেশৰ অযোধ্যাত উদ্বোধন হ’ব ৰাম মন্দিৰ। ইয়াৰ বাবে যুদ্ধগতিত নামি পৰিছে শাসকীয় বিজেপি। এই লৈ কিছু ৰাজনৈতিক বিবাদৰো সূচনা হৈছে।
সমান্তৰালকৈ অহা বছৰৰ ফেব্ৰুৱাৰী মাহত সংযুক্ত আৰব আমিৰশ্বাহীৰ ৰাজধানী আবুধাবিত হিন্দু মন্দিৰ উদ্বোধন কৰিবলৈ সাজু হৈছে প্ৰধানমন্ত্ৰী নৰেন্দ্ৰ মোদী। তাৰ পূৰ্বে ২২ জানুৱাৰীত অযোধ্যাত ৰাম মন্দিৰ উদ্বোধন কৰিব মোদীয়ে।
২৪ৰ নিৰ্বাচনত বিজেপিয়ে ৰাম মন্দিৰক নিৰ্বাচনী হাথিয়াৰ ৰূপে ব্যৱহাৰ কৰিব বুলি চৰ্চা চলিছে। নিশ্চিতভাৱে ইয়াৰ পূৰ্ণ সম্ভাৱনাই আছে। তাৰ মাজতে কংগ্ৰেছৰ জ্যেষ্ঠ নেতা শশী থাৰুৰে এই বিষয়ত এক বিশেষ মন্তব্য কৰিছে।
থাৰুৰৰ দাবী, ২০২৪ৰ নিৰ্বাচনত বিজেপিয়ে নৰেন্দ্ৰ মোদীক দেশবাসীৰ আগত হিন্দু হৃদয় সম্ৰাট হিচাপে প্ৰক্ষেপ কৰিব। অযোধ্যাত ৰাম মন্দিৰ আৰু আবুধাবিত হিন্দু মন্দিৰ উদ্বোধনৰ পিছত অতি সোনকালে নিৰ্বাচন আহ্বান কৰা হ’ব বুলি সম্ভাৱনা প্ৰকাশ কৰে থাৰুৰে।
শশী থাৰুৰে লগতে অভিযোগ কৰে যে ২৪ৰ লোকসভা নিৰ্বাচন হিন্দুত্ব বনাম জনকল্যাণ হিচাপে গঢ় লৈ উঠিছে। তেওঁৰ ভাষাত ২০০৯ চনত মোদীক অৰ্থনৈতিক বিকাশৰ অৱতাৰ হিচাপে দেশৰ ভোটাৰসকলৰ ওচৰত বিক্ৰী কৰা হৈছিল আৰু ভাৰতীয়ৰ উন্নয়ন আনিব বুলি কোৱা হৈছিল।
কিন্তু বিপজ্জনক বিমুদ্ৰাকৰণৰ পৰিপ্ৰেক্ষিতত সেই আখ্যান ভংগ হোৱাত ২০১৯ৰ নিৰ্বাচনত পুলৱামা আক্ৰমণে মোদীক ৰাষ্ট্ৰীয় সুৰক্ষাৰ নিৰ্বাচনলৈ ৰূপান্তৰ কৰাৰ সুযোগ দিছিল বুলি থাৰুৰে লগতে দাবী কৰে।
গতিকে এইবাৰ বিজেপিয়ে মোদীক হিন্দু হৃদয় সম্ৰাট হিচাপে প্ৰক্ষেপ কৰিব বুলি দাবী কৰে থাৰুৰে। এই বিষয়বোৰে কিছুমান প্ৰশ্ন সমুখলৈ আনে বুলি উল্লেখ কৰে থাৰুৰে।
থাৰুৰৰ প্ৰশ্ন, “আচ্ছে দিনৰ কি হ’ল? বছৰত ২ কোটি চাকৰিৰ কি হ’ল? অৰ্থনৈতিক বিকাশৰ কি হ’ল যি আৰ্থ-সামাজিক স্তৰৰ নিম্ন স্তৰবোৰক লাভান্বিত কৰিব? প্ৰতিজন ভাৰতীয়ৰ পকেট আৰু বেংক একাউণ্টত নিষ্পত্তিযোগ্য উপাৰ্জন ৰখাৰ প্ৰতিশ্ৰুতি কি হ’ল?”
আগন্তুক লোকসভা নিৰ্বাচনত এই প্ৰশ্নসমূহৰ ওপৰত বিতৰ্ক হ’ব লাগিব আৰু নিৰ্বাচনক হিন্দুত্ব বনাম জনকল্যাণ হিচাপে গঢ়ি তুলিব বুলি জ্যেষ্ঠ কংগ্ৰেছ নেতাগৰাকীয়ে লগতে কয়।
