বিফল হ’ল নৰেন্দ্ৰ মোদী চৰকাৰৰ উচ্চাকাংক্ষী প্ৰধানমন্ত্ৰী ইন্টাৰশ্বিপ আঁচনি (PMIS)। আঁচনিখনৰ প্ৰাৰম্ভিক পৰ্যায়ৰ এবছৰ উকলি যোৱাৰ পিছতো ইয়াৰ গ্ৰহণযোগ্যতাৰ হাৰ অত্যন্ত কম আৰু এই আঁচনি ত্যাগ কৰাৰ হাৰ উদ্বেগজনক হৈ পৰিছে। সংসদৰ শীতকালীন অধিৱেশনত কৰ্পৰেট পৰিক্ৰমা মন্ত্ৰালয়ে দাখিল কৰা প্ৰতিবেদনত এই তথ্যত প্ৰকাশ পাইছে। অহা পাঁচ বছৰত এক কোটি যুৱক-যুৱতীক প্ৰশিক্ষণ দিয়াৰ লক্ষ্যৰে আৰম্ভ কৰা এই আঁচনিখনৰ অধীনত দুয়োটা পৰ্যায়তে ১.৬ লাখতকৈ অধিক অফাৰ দিয়া হৈছিল যদিও মাত্ৰ ১৬,০০০ প্ৰাৰ্থীয়েহে প্ৰকৃততে ইন্টাৰশ্বিপত যোগদান কৰে।
কৰ্পৰেট পৰিক্ৰমা ৰাজ্যিক মন্ত্ৰী হৰ্ষ মলহোত্ৰাই তৃণমূল কংগ্ৰেছৰ সাংসদৰ এক লিখিত প্ৰশ্নৰ উত্তৰত এই তথ্য দাখিল কৰে।
মূল তথ্যসমূহ এনেধৰণৰ:
প্ৰথম পৰ্যায়ত: ৬০,০০০তকৈ অধিক প্ৰাৰ্থীক বাচনি কৰিছিল, যাৰ ভিতৰত ৮,৭০০ জনে যোগদান কৰে।
দ্বিতীয় পৰ্যায়ত: ৭১,০০০ প্ৰাৰ্থীক বাচনি কৰিছিল, যাৰ ভিতৰত ৭,৩০০ জনে যোগদান কৰে।
মুঠ যোগদান: দুয়োটা পৰ্যায় মিলাই মুঠ ১৬,০০০ প্ৰাৰ্থীয়েহে ইন্টাৰশ্বিপত যোগদান কৰে।
উল্লেখযোগ্য যে, ২০২৫-২৬ বিত্তীয় বৰ্ষৰ বাবে আঁচনিখনৰ বাবে ১০,৮৩১ কোটি টকাৰ আবণ্টন থকাৰ পিছতো কৰ্পৰেট পৰিক্ৰমা মন্ত্ৰালয়ে ২০২৫ চনৰ ৩০ ছেপ্টেম্বৰলৈকে মাত্ৰ ৭৩.৭২ কোটি টকাহে ব্যয় কৰিছে, যিটো আবণ্টিত বাজেটৰ এক অতি সামান্য অংশ।
মন্ত্ৰালয়ে প্ৰকাশ কৰা তথ্য অনুসৰি, ৫ৰ পৰা ১০ কিলোমিটাৰতকৈ অধিক যাত্ৰা কৰিবলৈ প্ৰাৰ্থীৰ অনিচ্ছা, সাধাৰণ দক্ষতা-প্ৰশিক্ষণ কাৰ্যসূচীতকৈ অধিক দীঘলীয়া, অৰ্থাৎ বছৰজোৰা কাৰ্যকাল আৰু প্ৰস্তাৱিত ভূমিকাসমূহৰ প্ৰতি আগ্ৰহৰ অভাৱৰ বাবে এই কাৰ্যসূচী ত্যাগ কৰাৰ মূল কাৰণ বুলি উল্লেখ কৰিছে।
উল্লেখ যোগ্য যে আবেদনকাৰীৰ সংখ্যাৰ ক্ষেত্ৰত অন্ধ্ৰ প্ৰদেশে (৫১,২২৫) শীৰ্ষস্থানত আছে, ইয়াৰ পিছতে আছে উত্তৰ প্ৰদেশ আৰু মধ্যপ্ৰদেশ। অৱশ্যে, প্ৰকৃত নিযুক্তিৰ ক্ষেত্ৰত উত্তৰ প্ৰদেশে (১,৯১৩) আটাইতকৈ বেছি নামভৰ্তিৰে শীৰ্ষস্থান দখল কৰিছে, তাৰ পিছতে আছে অসম (১,৮০৬) আৰু মধ্যপ্ৰদেশ (১,২৪৭)।
অনুসূচিত জাতি (SC) আৰু অনুসূচিত জনজাতি (ST) প্ৰাৰ্থীৰ ক্ষেত্ৰতো প্ৰকৃত যোগদানৰ হাৰ হ্ৰাস পোৱা দেখা গৈছে। যদিও অংশীদাৰ কোম্পানীসমূহে এই শ্ৰেণীৰ প্ৰাৰ্থীসকলক মুঠ ৩০,০০১টা অফাৰ দিছিল, তথাপিও প্ৰকৃততে যোগদান কৰা প্ৰশিক্ষাৰ্থীৰ সংখ্যা প্ৰথমপৰ্যায়ৰ পৰা ১,৮০২ জনৰ পৰা দ্বিতীয় পৰ্যায়ত ১,৩৬৪ জনলৈ হ্ৰাস পাইছে।
আনহাতে মুঠ ১৭টা কোম্পানীত মাত্ৰ ৯৫ জন প্ৰশিক্ষাৰ্থীকহে নিযুক্তি দিয়া হৈছিল। মুথুট ফাইনেন্স (৩২), টেক মহিন্দ্ৰা (২০), আৰু মানপ্পুৰম ফাইনেন্স (১৪) হৈছে সৰ্বাধিক নিযুক্তি দিয়া কোম্পানীবোৰৰ ভিতৰত অন্যতম। তেল আৰু প্ৰাকৃতিক গেছ নিগম (ONGC) হৈছে একমাত্ৰ ৰাজহুৱা খণ্ডৰ সংস্থা যিয়ে স্থায়ী নিযুক্তি প্ৰদান কৰিছিল।
